Bacheloritut ilinniagaq nutaaq: Aappaagumiit Angakkutut ilinniagaqalersinnaanngorputit

Aprilip aallaqqaataani salloqittavimmi una allaaserisaavoq. Taamaammallu ilumoorani.

Qaammatialunni kingullerni Ilisimatusarfik ulapissimavoq. Angakkutummi professionsbachelorinngorsinnaaneq piviusunngoqqajaalerpoq.

Ilinniagaq 2024-mi aallarnerneqarsinnaanngussasoq, Ilisimatusarfimmi Rektori, Gitte Adler Reimer KNR-imut oqarpoq.

-Ilisimatusarfimmiit qilanaartupilussuuvugut 2024-miit ammaassinnaagatsigu ilinniagaq, ilinniagaqartitsilersinnaagatta angakkutut, nuannaarutigisupilussuuarput.

Nalornissutigugukkulu angakkutut ilinniarsimalluni sumi atorfinittoqarsinnaanersoq, Gitte Adler Reimerip oqarnera naapertorlugu angakkunngorsimangaanni suliffeqarfinni annerni  siunnersuisartunngortoqarsinnaavoq.

Ilisimatusarfik akisussaaffimmik tigusivoq

Ilinniarfik sorleq Ilinniakkammut nutaamut akisussaasuussanersoq nalornissutigineqaqqarsimavoq, Ilisimatusarfimmili pisortat akisussaaassusermik takutitsipput.

- Aperineqallattaartariaratta misissorluariarlugu angakkunngornissamut ilinniakkamut aallartitsisinnaaneq piviusunngortissinnaasoralugu, taakkua arlaliummata aperillattaartartut taavalu misissueriarluta paasivarput taanna Ilisimatusarfiup pigisinnaangaa suliassaq, Gitte Adler Reimer KNR-imut oqarpoq.

Professionsbacheloritut ilinniagaq ukiunik pingasunik sivisussuseqassaaq, tamannalu bacheloritut ilinniakkatut allatut sivisutigipajaartoq, Gitte Adler Reimer oqarpoq.

-Una angakkutut ilinniarneq ukiunik pingasunik sivisussuseqarpoq, sivisulaajuvoq taavalu aamma ilinniarnerup iluani angakkunik ilinniartut siunnersuisoqartassapput taava naatsorsuutigaarput 2024-miit ilinniagaq aallartinneqassasoq, iluaqutissartai annertuujusut takusinnaavarput.

Bacheloritut ilinniagaq siullerpaajulluni atuagarsornerup tungaatigut piumasaqaateqanngitsoq

Professionsbacheloritut ilinniagaq nutaaaq, "Angakkoq"-mik taaneqartoq, bacheloritut ilinniakkatut allatulli piumasaqaatitaqartiginngilaq. Kalaallit ileqqutoqaannik ilisimasaqarnissaq  piumasaqaataavoq.

-Piumasaqaatit annerpaartarivaat taanna kalaallit ileqqutoqaannik aallussinissaq, minnerunngitsumik qilaatersorneq taanna aamma aallunneqarlunilu, annertuumik aallunneqassooq ilinniakkami. Aamma taanna piginnaaneqarfiginissaa piumasaqaatitta annerpaartaat ilagissavaat, Gitte Adler Reimer KNR-imut oqarpoq.

Angakkutut ilinnialerusuttunik tikilluaqqusinissamut Ilisimatusarfik qilanaartoq Gitte Adler Reimerip oqaatigaa.

-Taavalu tulluartuusorivarput ilinniakkat aallartinnissaa. Tassami Ilisimatusarfiup illorsuartaa Ilimmarfimmik ateqarmat.