Aalisartut uummannarmiut ikiorneqalersut: Assartuutissaq avannamukartinneqartoq
Aalisartut Uummannarmiut pisaminnik tunioraasinnaanngoqqipput. Illoqarfiummi aalisakkanik tunisassiorfii marluk erngup uuliamik mingutsinneqarnerata kingora ulluni aqqaneq-marlunni matoqqatinneqarput.
Royal Greenland aalisakkanik Uummanamut tulaassanik Qasigiannguani aamma Ilulissani tunisassiorfimminut kilisaatiminik assartuisinnaanerminut Naalakkersuisunut ataasinngornermi qinnuteqarpoq.
Naalakkersuisullu Royal Greenlandip kilisaamminik Uummannami assartuutilerusulluni qinnuteqaata ataasinngornermi ualilluartoq akuersissutigaat.
- Tassa imeqarnikkut fabrikkimi pissutsit atorsinnaalernissaata tungaanut, Jens Immanuelsen aalisarnermut naalakkersuisoq oqarpoq.
AAMMA ATUARUK Peter Grønvold Uummannameersoq: Taama nalaataqariataarneq sakkortoorujussuuvoq
Tamannalu tassa isumaqarpoq Uummannami aalisartut Royal Greenlandip illoqarfimmi tunisassiorfianut ullumi marlunngornermiit nalinginnaasumik tulaassisinnaalernerannik, taama Royal Greenlandip Uummannami tunisassiorfia KNR-imut ilisimatitsivoq.
Sulisartut 31-t suli angerlarsimatinneqartut
Taamaalilluni Uummannami aalisartut Royal Greenlandimut tulaassugaat Royal Greenlandip Uummannami toqqorsiviinut nillataartunut katersorneqalerput. Kingornalu Royal Greenlandip kilisaataanik Qasigiannguanut Ilulissanullu assartorneqartassapput.
Tamannali aamma isumaqarpoq Royal Greenlandip tunisassiornerminik uninngatitsigallarnerani aalisakkerivimmi sulisut 31-t angerlarsimatinneqarallarnerannik.
Aalisakkanimmi tulaassanik tigooraaginnarallarnermi sulisartut sisamat ullukkut sulisorineqartarnissaat, kiisalu unnukkut pingasut sulisinneqartarnissaat, taamaallaat naatsorsuutigineqarallarpoq.
AAMMA ATUARUK 8 til 10 borgere har haft symptomer i weekenden
Royal Greenlandip nittartakkamini ilisimatitsissutigivaa kilisaat Sermilik, Uummannamut tulaassanik Qeqertarsuup Tunuanut assartuisussaq, Kujataanit Uummanniartinneqartoq. Kilisaat Uummannamut ullut marlussuit qaangiuppata apuutissangatinneqarpoq.
Uummmannami aalisartut aamma inatsisartunut ilaasortaq Siumumeersoq Karl Kristian Kruse Uummannami umiarsuarmik tunitsiviliisoqarnissaanut imaluunniit umiarsuarmik assartuisoqalernissaanik piumasaqartuupput.
Uummannami Nukissiorfinni sulisup kukkuluttorneratigut uulia Uummannami imernut pilersuutinut akuleruttoortinneqarpoq. Tamanna septembarip aqqarngani pivoq, kisianni aatsaat tallimanngornermi septembarip 19-ani paasineqarluni.