Peqqinnissaqarfik Uummannaq: Inuit 8-10 akornanni ersiutaasinnaasumik malugisaqartut

- Inuttaasut eqqissisimasumik atorpaat, uivertoqanngilaq. Oqarsinnaavunga taama eqqisisimatigimmata tupaallannarpoq, Uummannap peqqissaaviani peqqissaasoq, Helle Mølstrøm oqarpoq.

Uummannami ajutoortoqarnerata kingunerisaanik imeqarfik matugallarneqarpoq.

AAMMA ATUARUK Uummannami erngup mingutsinneqarnera sorpassuarnik matoqqatitsivoq

Ajutoorneq peqqutigalugu, imeq najoqqagassaq uuliamik sapaatit akunnerat kingulleq mingoqarsimavoq.

Taamaakkaluartoq peqqinnissaqarfik immikkut ulapinnerulersimanngilaq. Imermik njoqqaanermik peqquteqartumik napparsimmavimmut innartitsisoqanngitsoq, Helle Mølstrøm ilisimatitsivoq.

Innuttaasulli arlallit imeq mingutsitaq pissutigalugu peqqissutsimikkut ippigusuuteqarsimapput.

- Sapaatip akunnerata naanerani inuit arfineq pingasut qulillu akornanniittut imermik imersimanerup kingunerisaanik ersiutaasinnaasunik pasitsaassaqarlutik sianerput, taakkunanngalu ikitsunnguit napparsimmaviliarlutik, unissutsitsinngilagulli, taanna oqarpoq.

AAMMA ATUARUK Uuliamik mingutsitsineq: Uummannami imeq suli imerneqarsinnaanngilaq

Taassuma nassuiaanera naapertorlugu takussutaasimasut tassaapput niaqorlunnerit, timminnerit anillattoornerillu.

Uuliaq aniasimasoq mikisuummat Nunatsinni nakorsaaneq Henrik L. Hansenip aarlerinartoqassangatinngilaa.

- Pisoq ernumanartoqartippallaanngilara. Uulia imermut kuutsinneqarsimavoq, kisianni erngup qaavaniiginnarpoq, uulialu atuisunut apuuttoq mikisuararsuusimagunarpoq, Henrik L. Hansen oqarpoq.

- Uummannarmiut piffissami tassani sunnertissimassagunik, tamatuminnga arlaatigut napparsimalersimanissaannik ilimasunnissamut pissutissaqanngilaq. Uulia mikisuararsuaq sivikitsumi imermiissimavoq, tamannalu taama mikitigitillugu timimut sunniuteqarneq ajorpoq.

Uummannami imeq kuuffimmeersoq suli imerneqarsinnaanngimmat, Uummannami innuttaasut Nukissiorfiit allaffianut, napparsimmavimmut, utoqqaat illuanut, heliportimullu imermik aallertoqarsinnaasoq Nukissiorfiit facebookiminnut nalunaarutigaat.

Imermut tunngatillugu innuttaasunut Uummannami Edvard Krusep atuarfiani ataatsimiitsitsisoqassasoq ilanngullugu allapput.