Uummannami erngup mingutsinneqarnera sorpassuarnik matoqqatitsivoq
Meeqqat atuarfianni atuartut 183-it aamma ilinniartitsisut 28-t Uummannami Atuarfik Edvard Krusep erngup uuliamik mingutsinneqarnerata kinguneranik ataasinngornermi matoqqatinneqartariaqarnerani eqqorneqarput.
Illoqarfiup aalisakkanik tunisassiorfii marluusut aamma eqqorneqartunut ilaapput. Avannaa Seafoodimit KNR-imut ilisimatitsissutigineqarpoq suliffeqarfiup sulisuni angerlarsimatikkai, soorlu aamma Royal Greenlandip uummannarmiut sulisartut 20-t kiisalu kiniiserit suliartortitat 14-it ataasinngornermi angerlarsimatiinnartariaqarsimagai.
Uummannami imeqarfimmi illoqarfimmut imermik pilersuisumi uuliamik sapaatip akunnerani sivisussuseqartumik mingutsitsisoqarsimavoq. Taama politiit Nukissiorfiillu tallimanngornermi ilisimatitsipput.
AAMMA ATUARUK Uummannami imeq uuliamik mingutsitaasoq
Taamaammat Uummannami tatsimit imeqarfimmit erngup aqqutaanut imermik salinneqanngitsumik ingerlatitsisoqarpoq. Imeq taanna salinneqanngilaq aamma klorimik akoqanngilaq.
Nukissiorfiit suliaqarnerminni imeqarfik matuaat.
Suliffeqarfiit pisortanit ingerlanneqartut kiisalu aalisakkeriviit Uummannami erngup mingutsinneqarneranit kisimik eqqorneqanngillat.
Namminersortut aamma eqqorneqartut
Illoqarfiup timersortarfia imminut pigisoq, arfineq-pingasunillu sulisoqartoq, tallimanngormalli matoqqavoq.
Timersortarfik cafeteriaqarpoq ullup qeqqanut kissartunik sassaalliuteqartartoq, tassanilu sisamanik sulisoqarpoq, timersortarfittaanilu aamma sisamanik sulisoqarluni.
- Assorujussuaq kipiluttunarpoq cafeteriamit timersortarfiullu atorneqarnissaraluanit isertitassaraluagut annaangatsigit, Uummannami timersortarfiup pisortaa, Gert Fleischer KNR-imut oqarpoq.
Aamma neriniartarfik namminersortoq, Cafemma, nerisassanik qaleriaannarnik sassaalliuteqartartoq tallimanngornermili matoqqatinneqalerpoq.
AAMMA ATUARUK Politiit: Uummannami imeq uuliamik mingutsinneqarpoq
Cafemma aamma ineeqqanik unnuisarfinnik attartortitsisarpoq, kisianni suliffeqarfiup Uummannanniartussat sisamat sapaatip akunnerata naanerani nalunaarfigisariaqarsimavai unnuisinnaassanngikkallartut, suliffeqarfiup unnuisarfiutini atorneqareeraangata eqqiarsinnaajunnaarallarmagit.
Taakkua saniatigut aamma Pilersuisup iffiorfia eqqorneqarpoq. Pilersuisumit KNR-imut ilisimatitsissutigineqarpoq Pilersuisup Uummannami pisiniarfiata iffiorfia qaqortulianik rundstykkinillu iffiorfiusinnaajunnaaqqangallartoq, suliffeqarfiulli KNR-imut ilisimatitsissutigivaa Pilersuisoq kaaginik assigisaanillu qalariaannarnik Uummannami suli iffiorsinnaasoq.
