Politiit: Uummannami imeq uuliamik mingutsinneqarpoq
Kukkusoqarsimanera pissutigalugu Uummannami imeq imerneqartartoq ulluni kingullerni arfineq pingasuni uuliamik akoqalersimavoq.
Kalaallit Nunaanni politiit tusagassiuutinut nalunaaruteqarlutik taama allapput
Politiit nalunaarutaat naapertorlugu, Nakorsaaneqarfiup nalilerpaa, imeq uuliamik mingutsinneqarsimasoq piffissami sivikitsumi imerneqarsimatilluni napparsimalissutigineqarsinnaanera naatsorsuutigineqanngitsoq.
Piffissamili sivisuumi imerneqarsimatillugu ajoqutaasinnaasoq nakorsaaneqarfiup nalilerpaa.
Politiilli nalunaarutaanni paasissutissiissutigineqanngilaq piffissaq sivisooq qanoq sivisutigisoq pineqarnersoq, mingutsitsisoqarsimaneralu pillugu peqqinnissamut tunngassuteqartunik innutaasut apeqqutissaqarunik, Uummannami Peqqissaavimmut saaffiginninnissaat innersuussutigineqarluni.
Erngup aqqutaanut imermik salinneqanngitsumik ingerlatitsisoqarpoq
Nukissiorfiit imeqarfik matuaat maannakkullu ajornartorsiut aaqqinniarlugu sulipput.
Taamaattumik Uummannami tatsimit imeqarfimmit erngup aqqutaanut imermik salinneqanngitsumik ingerlatitsisoqarpoq. Imeq taanna salinneqanngilaq aamma klorimik akoqanngilaq
Nunatsinni Nakorsaaneqarfik inassuteqarpoq imeq salinneqanngitsoq, maannakkut illumi erngup kuuffiiniit pineqarsinnaasoq imerneqassanngitsoq, nerisassiornermut atorneqassanngitsoq, kigutigissanermut atorneqassanngitsoq.
Taamatuttaaq inuttut eqqiluisaarnermut atorneqarnissaa inassutigineqanngilaq, perusuersartarfimmeereerluni assaat errortornerat eqqaassanngikkaanni, tassa imeq uuliamik mingutsinneqarsimasinnaammat amerlutsitsisinnaallunilu, Nukissiorfiit taama allapput.
Nukissiorfiit allaffianut imermik imerneqartussamik aallertoqarsinnaavoq.
Tankit imiisiviit maannakkut imaarneqarnissaat inassutigineqanngilaq.
- Imeq uuliamik mingutsinneqartoq qalaanneqarnermigut mingutsinneqarnera peernavianngitsoq erseqqissaatigineqarpoq.
Uummannami innutaasut Uummannami Nukissiorfiup allaffeqarfianut imermik aallersinnaapput arfininngornermi ullaakkut arfineq pingasuniit.
