Peter Grønvold Uummannameersoq: Taama nalaataqariataarneq sakkortoorujussuuvoq

Uummannarmiut imermik kuuffimmeersumik sapaatip akunnera ataaseq imersinnaanngillat.

- Sakkortoorujussuuvoq taamannak nalaataqariataarneq, Peter Grønvold Uummannami najugalik oqarpoq.

Taassuma panini atuariartulersoq pisarnermisut imermik dunkimut taqusserpaa.

Peter Grønvoldillu imeq naliginnaanngitsoq paasigamiuk nuliani attavigipallappaa:

- Nuliara atuarfimmut sianerfigipallappara, panipput imermik taquartarmat, imigassaa taanna taquaa kuiartoqqullugu iminnginnerani imeqqunagulu, Peter Grønvold oqarpoq.

AAMMA ATUARUK Imeq kuuffinnniittoq imerneqarsinnaaleqqippa: Uummannarmiut aqagu paasisaqassapput

Taassumalu pania sapigaqarmat imermik minguitsumik atorfissaqartitsipput:

- Panitta atisai erroramigit amiluttarami taava atigamigit ingerlaginnaq malugivaa ungillerilerlunilu.

Aalisartunut, fabrikkimi sulisunut innuttaasunullumi tamanut imeqannginneq eqquivoq. Peter Grønvoldillu erngup atorneqanngiivinnissaa innersuussutigalugu oqaatigaa, naak Nukissiorfiit imeq errorsinernut atorneqarsinnaasoq naliliigaluartut. Imermi tipeqangaatsiarpoq:

- Biilileriffinnut tamakkua saffiorfinnut iseraanni tipeq ersittartoq oliesunni, imeq kuutsikkaangatsigu illup iluanut taamannak sunniuttarpoq.

AAMMA ATUARUK Nukissiorfiit Uummannaq: Klorimik kuisiniarluni uuliamik kuisisoortoq

Uummannami imeqarfimmi illoqarfimmut imermik pilersuisumi septembarip aqqarngani klorimik kuisiniarnermi uuliamik kuisisoqarsimanera aatsaat ullut qulingiluat qaangiummata innuttaasut naamasinnaanngormassuk paasineqarpoq.

Taamaammat ilaqutariit Grønvoldikkut Nukissiorfimmiit imeq innuttaasunut utaqqiisaasumik atugassiaq nilaallu erruinernut assigisaannullu atorpaat.

Uummannami innuttaasut Timersortarfimmi ullumi arfinernut ataatsimiisinneqarput. Tassani Peqqinnissaqarfimmiit Nukissiorfimmiillu peqataasoqarpoq.