Nukissiorfiit Uummannaq: Klorimik kuisiniarluni uuliamik kuisisoortoq
Inuup kukkuluttorneratigut Uummannami imeq sapaatip akunnerata siulianili najoqqarneqarsinnaajunnaarpoq.
- Uummannami imeqarfitsinni uuliamik mingutsitsisoqarpoq, tamannalu inuup kukkuluttorneratigut imeq klorimik akuniartillugu uuliamik akusoormagu pivoq, Nukissiorfimmi pisortaaneq, Michael Pedersen oqarpoq.
Uummannami imeqarfimmi illoqarfimmut imermik pilersuisumi septembarip aqqarngani klorimik kuisiniarnermi uuliamik kuisisoqarsimanera aatsaat ullut qulingiluat qaangiummata innuttaasut naamasinnaanngormassuk paasineqarpoq.
- Soorunami imeq nakkutigiuaannavipparput, misissuinitsinnili uuliaqarnersoq uuttortarsinnaasimanngilarput. Uuliap erngup qaani puttalanera taamaalillutalu takusinnaasimanngissoraarput, Michael Pedersen oqarpoq.
Qanoq ililluni taamaalisoqarsinnaagami?
- Sulisugut maskeqartarput, taamaalillutillu klorimik kuisinerminnik naamasaqarsinnaasaratik, taamaammallu uuliaanersoq naamaneqarsinnaasimanngilaq. Klori uuliallu akimut ersittumik qalipaateqarput, taamaammallu kloriunersoq uulianersorluunniit immikkoortikkuminaassimapput.
Sooruna aatsaat ullut qulingiluat qaangiummata erngup uuliamik akoqarnera paasineqarsinnaasimasoq?
- Uulia erngup qaani puttalagami, tallimanngornermilu aatsaat tanki imaarummat uulia naamaneqarsinnaalersimavoq, pisortaaneq oqaluttuarpoq.
Uulia dunki immaqaluunniit klori dunki assigiinngissuteqannginnamik?
- Erngup najoqqagassap isumannaatsuuneranik uppernarsaasersuisarneq suleriuserisarput, imeqarfinnilu arlanilli taama periuuseqarpugut. Periuseq taanna Uummannami imeqarfimmi atuleqqajaagaluarparput, erniinnarlu atulerumaarlugu. Tassalu ajutoorutaasinnaasut, soorlu erngup klorimiunngitsoq kisianni uuliamik akusoorneratut ittut, nungusarpagut.
Ajutoorneq pereerpoq, taamaammallu Nukissiorfiit illoqarfinnit allaniit imilersorneqarnissaq isumagileruttorpaa.
Uummannami erngup qaqugu najoqqarneqaqqissinnaalernissaa Nukissiorfiit nalunaarutigisinnaanngikkallarpaat, taamaattorli sisamanngorpat najoqqaneqaqqissinnaalissasoq neriuutigaa.
- Misiliutitut nassiussavut akuerineqarpata, avatangiisillu pillugit oqartussat akuerseriarpata, nalinginnaasumik ingerlaqqilissaagut. Qanorli sukkatigisumik tamanna pisinnaanersoq naluara, misissuisut pilertortigissanersut imerlu misissugaq qaqugu akuerineqassanersoq apeqqutaavoq. Kisianni Neriuppugut sukkasuumik tamanna pisinnaasoq, immaqa sapaatit akunneranni uani sisamanngorpat tallimanngorpalluunniit, Michael Pedersen oqarpoq.
Taassuma ilanngullugu oqaatigaa Uummannarmiut septembari qaammat imermut akiliisinneqassanngitsut.
- Ajuusaarutigaarput Uummannami innuttaasut tamanna nalaassinnaammassuk. Taamaammallu Uummannami innuttaasut imermut septembarimi akiliuteqannginnissaat qulakkeerparput, erngup aaqqinnissaata tungaanut.
00:02:36
