Aalisartut EU-mut ilaasortanngoqqinnissaq kissaatiginngilaat
Polar Seafoodip siulersuisuini aamma Sulitsisut peqatigiiffianni GE-mi siulittaasup Henrik Lethip Nunatta EU-mut ilaasortanngoqqinnissaminik isumaliuteqartariaqarneranik aviisimut Atuagagdliutinut oqaaseqarnerata kingorna kattuffik taama nalunaaruteqarpoq.
Aamma atuaruk Lethip EU-mut ilaasortanngoqqinnissaq isumaliutigeqqeqqugaa
Aalisartut piniartullu kattuffiata tusagassiorfinnut nalunaarutimini Henrik Lethip taama oqaaseqarnera tupigusuutigaa, taaassuma EU-mut suleqatigiinnissamik isumaqatigiissut pillugu ukiuni kingullerni pingasuni oqaatigisarsimammagu EU-mut aalisagartassiissutigineqartut kalaallit aalisartuinit aalisarneqartuuppata Nunatsinnut pitsaanerussagaluartoq.
Taamaammat KNAPK-p erseqqissaatigaa sinerissap qanittuani avataasiorlunilu aalisagatassat EU-mit oqartussaaffigineqalernissaat kattuffittut akuerisinnaanagu.