Aajap qimaasut pillugit akisussaaqataarusunnera ilaasa ajorigaat ilaasa nuannaraat

Aaja Chemnitz Larsen isumaqarpoq nunarput akisussaaqataalluni qimaasut ikikkaluit nunatsinnut tikilluaqqussagai, KNR-illu tusarnaartartuisa 100-t sinnillit tamanna oqaaseqarfigaat.

- Isumaqarpunga Europami Danmarkimilu maannakkorpiaq pisunik nutaarsiassatigut Nunatsinni malinnaasut amerlasuupilussuusut. Aamma isumaqarpunga amerlasuut qanoq iliuuseqarusunnermik misigisimassasut, Inuit Ataqatigiinnit folketingemut ilaasortaq pingasunngormat taama oqarpoq.

Taamalu oqarnera oqallitsitsilerpoq.

- Kalaallit Nunaat qimaasunut akissaqanngilaq!!! IA piviusumut iteritsi!!!

- Tusagassiutitigut takoqqusaarnerit kusanaak uffa nalungagu innuttaasugut amerlasuut ikiorneqartariaqartut.

Oqaaseqatit ilai taama nipeqarput.

Nunanut allanut tunngasunut naalakkersuisup, Vittus Qujaukitsup nunatsinnut qimaasunik tikittoqarnissaa itigartippaa Kalaallit Nunaata akissaqannginnera tunngavilersuutigalugu.

Aamma atuaruk Kalaallit Nunaat suli qimaasunut tunngasunut piareersimanngilaq

KNR-imillu tusarnaartartut ilaasa Aaja Chemnitzip oqaaseqarnera pissusissamisoorsoraat:

- Aajap taama oqarnermigut takutippaa Kalaallit Nunaat nunarsuarmioqataaneranik taamaalillunilu imminut mattuttariaqannginneranik isumaqarluni.

- Kalaallit Nunaanni inuuttaasut amerlanerussutillit naakkittartuullik inissaqartitsisut, taamaalilluni illuni inissaqartitsissapput aamma. Illoqarfinni inukillisimasuni qimaasut inissaqartinneqarsinnaanersut misissugassaqqikkaluarpoq.

Nammineq ajornartorsiutit qimaasullu ajornartorsiutaat assigiinngillat

Politikerip nammineerluni oqaatigaa qimaasut pillugit politikki nunattalu aningaasaqarnikkut inuiaqatigiinnilu ajornartorsiutai immikkoortinneqassasut:

- Aap, isumaqatigaara soorunami inuiaqatigiinni ajornartorsiutigut aaqqinniassagigut. Tassungalu aqqutissiueqataasimavunga. Tamannali akisussaaffimmik annertunerusumik tigusinissatsinnut akornutaassanngilaq, soorlu nunanut allanut tunngatillugu politikikkut akisussaaqataanissaq qimaasullu aamma pillugit, Aaja Chemnitz Larsen oqarpoq.

Erseqqissaatigaalu nunarput qimaasorpassuarnik hunnorujukkaanik tigusisinnaanngitsoq immaqali inuit 20-30-t missaat inissaqartinneqarsinnaagaluartut.

Aamma atuaruk Danskit politiivisa qimaasut ingerlaannarnissaat akuerigaat

Aatsaallu Kalaallit Nunaat qimaasunik tigusinissamik periusissaqalerpat.

- Erseqqissaatigerusuppara akuulersitsiniarnissamut periusissamik pitsaasumik sananissaq pingaaruteqartoq taamaalillunimi akuulersitsiniarnissamut piginnaasaqarnissaq anguneqassammat, Inuit Ataqatigiit sinnerlugu Folketingemut ilaasortaq oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat