Assi: Maasi Pedersen/KNR

Nunarput akisussaaqataalluni qimaasunik tigusisariaqarpoq

Nunatta nunarsuarmi sunniuteqaqataanissamik kissaateqarluni illuatungaatigullu nunarsuarmi qimaasut ilaannik tigusiumannginnera pissuserissaarnissamik isumagisat uniorlugit iliuuseqarnertut isigineqarsinnaavoq, IA-meersoq Aaja Chemnitz Larsen taama isumaqarpoq.

Nunarput inunnik ikiuiniarnermi akisussaaqataasariaqarpoq qimaasunillu ikitsunik tigusilluni.

Inuit Ataqatigiinneersoq Folketingimut ilaasortaq, Aaja Chemnitz Larsen, KNR-imut taama oqarpoq.

- Isumaqarpunga Europami Danmarkimilu maannakkorpiaq pisunik nutaarsiassatigut Nunatsinni malinnaasut amerlasuupilussuusut. Aamma isumaqarpunga amerlasuut qanoq iliuuseqarusunnermik misigisimassasut.

- Taamaammat aamma isumaqarpunga Nunatta tungaanit isummerfigineqartariaqartoq akisussaaqataalluni qimaasut ilaannik tigusissannginnersugut.

AAMMA ATUARUK Qimaasut pillugit Løkke ataatsimiigiaqqusinasuarpoq

 

Nunarput akissaqanngilaq
Nunarput Savalimmiullu qimaasunik ullumikkut tigusineq ajorput. Taamaakkaluartoq nunanit allamiunut oqartussaaffiup Danmarkimit Nunatsinnut nuunneqarnissaa sulissutigineqarpoq, tamatumunngalu peqatigitillugu Nunatta Danmark avaqqullugu nunanut allanut politikkimik ingerlatsilersinnaanissaa Inatsisartuni amerlanerussuteqartut kissaatigalugu.

Nunarpulli qimaasunik tigusissanersoq isummerfigineqarsimanngilaq, nunanut allanut naalakkersuisoq Vittus Qujaukitsoq (S), KNR-imut ataasinngormat oqarpoq.

Aamma nunatta tamanna akissaqartinnavianngikkaa, Qujaukitsup erseqqissaatigaa.

Taanna Atassummeersumit Steen Lyngemit ilalerneqarpoq, Facebookimilu ima allappoq: 

“Nunatta qimaasut ikiorsernissaannut naleqquttumik neqeroorfigisinnaassanerpai, ullumikkummi meerartavut tarnikkut timikkulluunniit ajornartorsiutillit ikiorsernissaannut ilaatigut ukioq ataaseq ukiulluunniit marluk tikillugit utaqqisinneqartarput? Taamaaliornissamut Atassutip maanna piffissaasorinngilaa."

Steen Lyngep taarsiullugu siunnersuutigaa nunarput nunanut akersuuffiusut qanittuaniittunut aningaasatigut ikiorsiissuteqartariaqartoq, taamaaliornikkut qimaasunik illusisitsisinnaaniassammata.

Aamma Europami ataatsimoorussamik qimaasunut aaqqissuussinermik pilersitsisoqarnissaanut Nunatta Danmark kimigiiserfigisariaqarnerarpaa.

AAMMA ATUARUK Aaja: Nunarput qimaasut pillugit tusaaniarneqartariaqarpoq


Arlaannaat qinertariaqarpoq

Aaja Chemnitz Larsen naapertorlugu, Nunarput qimaasunik tigusisussanngussagaluarpat akuulersitsiniarnissamik periusissioqqaartariaqassasoq.

Nunarsuarmioqataanermili sunniuteqaqataarusukkaanni tamatumunnga peqatigitillugu qimaasunik tigusiumanngittoqarsinnaanngilaq, Aaja Chemnitz Larsen isumaqarpoq.

- Isumaqarpunga illuatungaatigut nunanut allanut politikkikkut peqataanissamik noqqaalluni, illuatungaatigullu akisussaaffimmik tigusisussanngornermi akisussaaqataannginneq pissuserissaarnissamik isumagisat uniorlugit iliuuseqarnertut isigineqarsinnaasoq.

- Imaanngilaq qimaasorpassuarnik tigusissasugut. Isumaqarpungali isummerfigisariaqaripput, qimaasunillu ikitsunnguanik tigusinissarput isumaliutigalugu, kingornalu akuulersitsiniarnermik pitsaasumik suliniuteqarfigalutigit, Aaja Chemnitz Larsen taama oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat