Aaja: Nunarput qimaasut pillugit tusaaniarneqartariaqarpoq
Ministeriunerup Lars Løkke Rasmussenip (V) Folketingimi partiit siuttuinik tamanik Danmarkimi qimaasut pillugit ippassaq ataasinngornermi ataatsimiigiartitsigasuarpoq.
Ilaasortalli atlantikup avannaaneersut ataatsimiinnissamut qaaqqunneqanngillat, tamannalu folketingimut ilaasortap Inuit Ataqatigiinneersup Aaja Chemnitz Larsenip isornartorsiorpaa.
- Uggornartilluinnarpara. Folketingimi partiit allat naligalugit ataqqineqarnissarput ulluinnarni ilungersuutigereerparput. Ilisimatitsinermilu sammisamilu Danmarkimut, Naalagaaffeqatigiinnullumi, taama pingaaruteqartigisumi isumaqarpunga aamma uagut ilanngulluta ilisimatinneqarnissarput pissusissamisooraluartoq, KNR-imut taama oqarpoq.
Chemnitz isumaqarpoq ministeriunermit ataatsimiinnermut qaaqquneqannginnertik Folketingimi partiinik assigiinngisitsinerusoq.
AAMMA ATUARUK Qimaasut pillugit Løkke ataatsimiigiaqqusinasuarpoq
Aleqa aamma Skaale: Danmarkip nammineq isumagisassaraa
Naalagaaffeqatigiinni nunanit allamiunut tunngasut danskit suli oqartussaaffigaat, aamma Nunarput Savalimmiullu qimaasunik ullumikkut tigusaqarneq-ajorput
Taamaammat aamma folketingimut ilaasortaq Siumumeersoq Aleqa Hammond isumaqarpoq qimaasut oqallisiginissaat danskit namminneq isumagisassarigaat.
- Ministeriunerup partiit sorliit ilisimatitsinissamut qaaqqussallugit danskit naalakkersuisuisa pingaarnersiuinerat ataqqilluinnarpara (...). Nunanit allaminut oqartussaaffik ullumikkut Danmarkimiippoq, aamma uagut folketingimi ilaasortatut ataatsimiititaliani assigiinngitsuni ministeriunermullu apeqquteqarnissatsinnut periarfissaqartuaannarpugut, Aleqa Hammond (S) KNR-imut taama oqarpoq.
Savalimmiormiut folketingimut ilaasortaata Sjurdur Skaalep Savalimmiuni Socialdemokraatineersup aamma pisoq aalassaatiginngilaa.
- Ministeriunerup uatsinnik (atlantikup avannaamiut, aaqq.) qaaqqusinnginnera pillugu appiunneqarsinnaanngilaq, Savalimmiummi Kalaallillu Nunaat qimaasunut tunngatillugu ullumikkut akisussaaffeqanngillat, KNR-imut taama oqarpoq.
AAMMA ATUARUK Qimaasut pisuinnaq Sverigep tungaanut ingerlaartut
Aaja: Ilisimatinneqarnissaq pisariaqarpoq
Nunattali nunanit allamiunut oqartussaaffiup tigunissaa sulissutigaa, taamaammat ilaasortat atlantikup avannaaneersut aamma ilisimatinneqartariaqartut, Aaja Chemnitz Larsen isumaqarpoq.
Aamma folketingimut ilaasortatut Nunatsinneersutut Folketingimi nunanit allamiunut tunngatillugu suliani siunissami taaseqataasarsinnaanissani tunuartinngilaa.
- Nunatsinnut toqqaannanngikkaluartumik sunniuteqarsinnaasunik peqassappat, taava isumaqarluinnarpunga allatuulli pisinnaatitaagut. Tamannami aamma inatsisini tunngavisuni allassimavoq.
