Akitsuutit nutaat, Siumumi eqqissiviilliortoqarnera qaartitsinerlu: Politikkikkut 2019-imi pisut tallimat
Sukkunut, tupanut imigassamullu akitsuutit nutaat. Naalakkersuisunut akerliussutsimik takutitsinerit, Siumullu iluani eqqissiviilliortoqarnera Kim Kielsenip siulittaasuujunnarnissaanik kinguneqangajattoq.
Ukioq manna politikkikkut pisut ilaannaat tamakkuupput.
Ukioq naanera aallarniutigissavarput – novembarimimi innuttaasut Naalakkersuisunut akerliungaatsialerput.
Nuummi illoqarfiup qeqqata pingasunngornerit tulleriit marluk inunnit ulikkaavinneqarpoq, taakku suaartaateqarlutillu allagartarsualisaarput aamma Inatsisartut allaffiata saavani apummut sioraasanik kuioraasoqarpoq.
• Cigarrettit 82 koruunimit 86,50 koruuneqalerput.
• Sioraasat assingajaanik aamma akitsorput. 21,95 koruunimit 26,50 koruunimut.
• Carlsberg ataaseq 18,50 koruunimit 19,25 koruunimut.
• Mamakujuit aamma akisunerulerput: Haribomit puussiaaqqat, 375 gramimik oqimaassuseqartut 65 koruuneqarsimasoq, 67 koruuneqalerpoq.
• Sukkulaateeqqat 50 øremik akisunerulerput.
Paasissutissarsiffik: Brugseni
Inatsisartut novembarip 18-ianni tassanngaannartumik nutaanik akitsuusiinerat ilaatigut sukkut, imigassat tupallu akisunerulernerannik kinguneqartoq innuttaasut akerliulernerannut aallarniutaalluinnarput.
AAMMA ATUARUK Akerliussutsimik takutitsisut Kim Kielsen oqalugiarnerani tunukkaat
Aningaasanut inatsimmi amigartoortuteqarnerujussuaq matussuserneqartussaavoq – politikerillu akinik qaffaaneq innuttaasut peqqinnerannut pitsanngorsaataassasoq tunngavilersuutigaat.
Naalakkersuisut akitsuutit peqqinnerulersitsisussatut taagugaat ukiuni tulliuttuni sisamani 182 millionit koruunit missaannik iluanaarutaassapput. Tamatuma illuatungaani ingerlatseqatigiiffinnut akileraarutit 5 procentpointit missaannik appaaffigineqarput. Tamanna nunatta karsianut ukiuni sisamani tulliuttuni 162 millionit koruuninik akeqartussaavoq.
Tamannalu akerliussutsimik takutitsisut mamiatsaatigilluinnarpaat.
- Uannut imminut sunniuteqarnavianngillat - kisianni inuiaqatigiinni sanngiinnerusut eqqorneqassapput. Naalliuuteqareerput. Suliffissat amerlanerutilernissaannut ingerlatseqatigiiffinnut akileraarutit apparnerat ajunngilaq - kisianni iluaqutassanersoq - tamanna takujumaarparput, KNR-ip akerliussutimik takutitsisoqarnerani naapitaasa ilaat, Paalu Bisgaard oqarpoq.
Siumup iluani eqqissiviilliortoqarnera
Aasaq politikkikkut eqqissiviilliortoqaqqippoq – tamaumani Siumut iluani. Siumut Inatsisartuni ilaasortaatitaasa amerlanerussuteqartut Kim Kielsen partiimi siulittaasuujunnaartinniarpaat.
Suliffeqarnermut aatsitassaqarnermullu Naalakkersuisuusimasoq Erik Jensen parteeqatini allat arfinillit peqatigalugit isornartorsiuipput.
Taanna naalakkersuisunit novembarimi tunuarpoq, ullualuit siornatigut Siumumi siulittaasup tullia, Karl Kristian Kruse Naalakkersuisunut aamma sakkortuumik isornartorsiuteqarpoq.
Tamatuma siornatigut Siumumi eqqissiviilliortoqarnera Siumut immikkoortortaqarfiinut aamma anngussimavoq. Immikkoortortaqarfiit 61-iupput, taakkunanngalu arfiniliinnaat nutaamik siulittaasortaarusunnertit nalunaarutigaat – taakku Kielsen takussaanngippallaarnerarpaat.
Kielsen aappassaaneerluni taperserneqarluarluni siulittaasutut atuuffimminiiginnarpoq.
AAMMA ATUARUK Politikkikkut naliliisartoq: Siumumi suli eqqissiviilliortoqarpoq
Siumut iluani eqqissiviilliornerni annerpaaq ukiaanera ataatsimiinnerit ulluisa naggataanni novembarip 22-anni pigunarpoq. Matumani naalakkersuisooqatigiit partiillu ikorfartortaasut Demokraatit Partii Naleqqap Kim Kielsenimut tatiginnikkunnaarnermik taasiniarnera akunnerpassuarni oqallisigaat.
Asii Chemnitz Narup borgmesteritut tunuartoq
Asii Chemnitz Narup Kommuneqarfik Sermersuumi ukiuni qulini borgmesterioreerluni juunip ulluisa aqqarnanni tunuarpoq.
Demokraatit tapersiigunnaarnerat tamatumani pissutaavoq. Aammali Tasiilami meeqqat atornerlugaasimasut pillugit suliaq maajimi oqallisigineqangaatsialersoq borgmesterimut isornartorsiuinermut sammilerpoq – isornartorsiuisummi nalunaarusiarpassuit ajornartorsiuterujussuaqarneranut ukiuni qassiiusuni tikkuussisimagaluartut suliat tataannartut qanoq ingerlaannarsinnaanersut apeqqutigaat.
Atassut apriilip 9-anni naalakkersuisooqataajunnaarpoq
Kim Kielsenip naalakkersuisooqatigiivini apriilimi nakeraattoqaqqippoq. Tamatumuuna Atassut naalakkersuisooqatigiinnit tunuarpoq.
Tamanna Atassutip Naalakkersuisunut ilaasortaatitaata Aqqalu Jerimiassenip silap pissusiata allanngoriartulernera inunnik pilersataaneranik upperinninnani Sermitsiaq.ag-mut oqarnerata kingunerisaanik assornartorsiulerneranut atassuteqarpoq.
- Silaannaap kissakkiartornera imatut upperinngilara. Kisiannili upperaara nunarsuaq nalinginnaasumik ingerlaaseqartoq. Ingerlanerani massakkut kissakkiartorpoq, tamannalu naleqqussarfigissavarput. Nunarsuaq nammineq allanngoriartorpoq, uagut allanngortissinnaanngilarput, Aqqalu Jerimiassen Sermitsiaq.AG-mut oqarpoq.
Demokraatit tamanna pissutigalugu Aqqalu Jerimiassenip soraarsinneqarnissaa Kim Kielsenimut piumasaraat. Kim Kielsenilli soraarsitsinnginnerani Atassutip partiini naalakkersuisooqataajunnaartoq nalunaarutigaa. Aqqalu Jerimiassen aamma Siverth K. Heilmann taamaalillutik naalakkersuisooqatigiinni peqataajunnaarput.
Atassut ukiup ingerlanerani nutaamik nutaamik siulittaasortaarpoq. Aqqalu Jerimiassenillu Siverth K. Heilmann siulittaasutut taarserpaa, taassumalu oqariartuutaa ersarippoq: Atassut naalakkersuisooqatigiinnut teknikkikkut suleqataaqqinnianngilaq. Naalakkersuisooqatigiinnimi suleqateqarnikkut Atassut pilliuteqarpallaartoq partii misigisimavoq.
- Ersarissumik massakkut politikkerput takutikkusupparput. Atassut anngaaginnartussiaaqqissanngilaq, Aqqalu Jerimiassen oqarpoq.
Mittarfissamut qaartitsineq siulleq
Nuummi mittarfissami oktobarip 16-ianni siullerpaamik qaartitsisoqarpoq. Mittarfissamut qaartitsineq siulleq piviusunngortinneqarpoq – tamannalu ukiorpassuarnik oqallisaangaatsiartup sakkortunerpaaffigaa.
Kim Kielsenip qaartitsinermi aqutsisoq nukappiararlu arfineq-pingasunik ukiulik Inooraq peqatigalugit qaartitsinissamut toortagaq toorpaat.
- Nunatta siunissaani kinguaariit taakkua tullinnguummata tassani (nukappiaraq aaqq.) qaartitsinermi peqatigivarput, Kim Kielsen oqarpoq.
* Nuummi Ilulissanilu mittarfiit sanaartorneqarnerat ukioq 2023-ip naalernerani naammassineqassasut naatsorsuutigineqarpoq.
* Qaqortumi mittarfissaq 2023-mi naammassineqarsimasussatut pilersaarutigineqarpoq, aappaagulu suliariumannittussarsiuunneqarnissaa naatsorsuutigineqarpoq.
Kim Kielsenip mittarfinnut pilersaarutit politikkikkut qularnartoqartitsilertartut sukataarutigisimavai. Taassuma nunat tamalaat akornanni politikkit annertuut nunatsinnilu politikki sammisariaqartarsimavai.
Kinamiut mittarfinnut pilersaarutinut aningaasaleerusunnerat Kinap Issittumut iserniarluni aningaasaliiniarniarnera USA-mit aarlerissutaasimavoq.
AAMMA ATUARUK Video: Booom – mittarfimmillu sanaartorneq aallartinneqarpoq
Naggaterpiaanili danskit naalagaaffiat aningaasaleeqataasutut inissippoq. Tamannali Siumut partiiata iluani kamaatigineqarpoq, Kim Kielsenillu partiimi siulittaasutut tunuarnissaanik piumasaqaateqarnermik kinguneqarluni.
Partii Naleqqap tamanna aamma kamaatigaa, danskit Nuummi Ilulissanilu mittarfiliortiternissamut danskit piginneqataalernerat akerlilerlugu partii 2018-imi naalakkersusisooqatigiinnit tunuarpoq.