Video: Booom – mittarfimmillu sanaartorneq aallartinneqarpoq

Kim Kielsenip arfineq-pingasunik ukiulik Inooraq peqatigalugu Quassussuup eqqaani qaartitsinissamut siullermut toortagaq toorpaa.
Allattoq Christine Hyldal
oktobarip 16-at 2019 19:01
Nutserisoq Connie Fontain

Qangorpallannerujussuaq Nuummilu mittarfiup 2200 meterimik takissuseqartup Quassussuup eqqaani sanaartorneqarnera aallartinneqarpoq.

Mianersoqqussutip biiiiiipimik nipeqartup takisuup kinguneratigut tammikaasoqarnissaanut sillimaniarnermut assersuutigineqartartut qangattarput, Kim Kielsenillu nukappiaraq arfineq-pingasunik ukiulik Inooraq qaartitsinermut toortakkamik toorseqatigaa.

- Tassa kiisami suliaq ukiorpassuarni eqqartorneqartoq piviusunngoraluttuinnarpoq. Maani Nuummi, Ilulissani, Qaqortumilu tassa suliassat aallartippagut maani. Tullinnguuppoq Ilulissani aappaagulu aasakkut Qaqortumiittoq suliaralugit aallartinneqassapput, qilanaarnaqaaq, Kim Kielsen KNR-imut oqarpoq. 

Mittarfiit pilersinneqarnerat Nunatsinnut qanoq sunniuteqarnissaat naatsorsuutigaagit?

- Tassa soorunami pinngitsoornatik sunniuteqassapput ineriartornermut tunngatillugu. Attaveqaatit tungaatigut eqaannerusumik avataaninngaanniit aamma tikinneqartarsinnaalissaagut illuatungaatigut avammut niuernerput annertusarsinnaavarput, takornariaqarnikkut inerisaasinnaavugut minnerunngitsumik nunatsinni illoqarfiit akornanni angallanneq eqaannerusumik ingerlanneqarsinnaalissaaq, Kim Kielsen oqarpoq.

Naalakkersuisut mittarfiit nutaat 2023-mit atorneqarsinnaalernissaat naatsorsuutigaat.