Politikkikkut naliliisartoq: Siumumi suli eqqissiviilliortoqarpoq
Siumumi eqqissiviilliortoqarnera ippassaq unikkallarpoq: Tassami Kim Kielsen partiimi Siumumi siulittaasuuginnassaaq. Siumumi ilaasortat nuimasut arfineq-marluk Kim Kielsen partiimi siulittaasutut tunuaqqugaluarpaat. Immikkoortortoqarfiilli 60-t tusarniarneqarmata, 40-it akipput. 34-llu tunuliaqutsiimmata Kim Kielsen siulittaasutut ingerlaannassasoq aalajangiunneqarpoq. Sulili eqqissiviilliortoqartoq, politikkikkut naliliisartoq Sermitsiamilu aaqqissuisoq Jensine Berthelsen oqarpoq:
- Eqqissiviilliortoqarpoq.
- Torrallannerliorpaat. Pissutigalugu Kim Kielsen nalunaareersimavoq siornali siulittaasutut sassaqqittussaanani, kinguaariit nikinnissaannut piareersaleruttorfiata partiip ingerlanerani taamatut eqqissiviilliornerit ingeqatigiilluni aaqqinneqarsinnagaluartunik, Jensine Berthelsen oqarpoq.
AAMMA ATUARUK Immikkortortaqarfiit aalajangiipput: Kim Kielsen siulittaasuuginnassaaq
Piviusut
- Siumup immikkoortortaqarfiit 61-iupput.
- Siulittaasup tullia Karl Kristiasn Kruse naapertorlugu immikkoortortaqarfiit qulingiluat piffissaliussaq qaangiutsinnagu attaveqarfigineqarsinnaasimanngillat.
- Immikkoortortaqarfiit 12-it attavigineqaraluarlutik piffissaliussaq naatinnagu akinngillat.
- Immikkoortortaqarfiit 40-t tusarniaaneq akissuteqarfigaat.
- Taakkunannga arfinillit siulittaasoq tatiginangu nalunaarput.
- Siulittaasumik tatiginninnginneq 34-t isumaqatiginngilaat.
Siumumi perulluliorneq augustimi aallartippoq, tassani Inatsisartunut ilaasortanit quliusunit arfinillit Kim Kielsenip tunuarnissaanik kissaateqarmata. Naalakkersuisoq Erik Jensen tunuaqqusisunut ilaavoq.
Makitaneq pisassiissutillu
Kim Kielsen ilaatigut pisassiissutinut tunngasunut qineqqusaarutit Siumullu politikkia aallaaviginagit sulinerarlugu isornartorsiorpaat. Siulittaasullu innuttaasunik kiisalu Inatsisartunut qinikkanik ataqqinninnginnera
tusaajumananilu naaperiarfigineqarsinnaanngittarnera isornartorsiuinerminnut ilaatigut peqqutaatippaat.
Atsioqataasut ilagaat Inatsisartut aningaasaqarnermut akileraartarnermullu ataatsimiititaliaani siulittaasoq Hermann Berthelsen.
Taassuma Nuummi Ilulissanilu mittarfissualiornissaq arlaleriarlugu isornartorsiorpaa, taakkua atulerpata, Kangerlusuarmi mittarfiup atornikinnerulertussaanera aarleqqutigalugu. Taamaalippammi, tamanna Sisimiunut Kangerlussuarlummullu kinguneqarnerlussaaq, Hermann Berthelsenilu tamaani qinigaavoq.
AAMMA ATUARUK Kielsenimut isornartorsiuisut ataatsimiissasut
Manngertikkaluttuinnarneq
- Illuatungeriit manngertikkaluttuinnarsimarpasipput. Illuatungaani aningaasaqarnermut ataatsimiititaliaq illuatungaani Naalakkersuisut Kim Kielsen siuttoralugu imminnut quppaliuussimarpasipput, Jensine Berthelsen oqarpoq.
Isornartorsiuisut arfineq marluk:
Anders Olsen, Nikkulaat Jeremiassen, Henrik Fleischer, Erik Jensen, Laura Táunâjik, Jens Danielsen aamma Hermann Berthelsen.
Erseqqissaatigaa taamatut eqqissiviilliortoqarnera illuatungiliuttunit ukiaanerani ataatsimiinnermi arlaatigut atorluarneqarsinnaasoq.
- Najummatsisimaneq tassunga killinngilaq. Inatsisartuni qanoq pisoqarumaarnersoq, illuatungiliuttut aamma atorluariaannaagamikku pissutissamik nassaarsorigunik Kim Kielsen upperiseriassallugu,
Kim Kielsen pissarsiariniaraluarpaput - iluatsinngitsumilli.
