Kielsenimut isornartorsiuisut ataatsimiissasut

Inatsisartunut ilaasortani Siumumeersuni qulini arfinillit Naalakkersuisunullu ilaasortap ataatsip Kim Kielsen Siumup siulittaasuatut tunuaqqullugu septembarip ulluisa 13-ianni nalunaarutigaat.

Kim Kielsenili Siumup immikkoortortaqarfiini tusarniaanermut akissuteqarsimasuni amerlanerussuteqarluartunit tapersersorneqartoq ataasinngornermi paasinarsimmat, tunuaqqusissummut atsiortut arfineq marluk maanna qanoq iliornissartik paasiniarlugu ataatsimiissapput.

AAMMA ATUARUK Immikkortortaqarfiit aalajangiipput: Kim Kielsen siulittaasuuginnassaaq

- Taanna siulersuisuunerit nalunaarutaat ulloqeqqata kingorna takkuttoq soorunami tiguarput, taavalu tassanngaanniit iliuusissarput siulleq tassaavoq uagut atsioqatigiittut arfineq marluusugut nalunaarut taanna pillugu piffissami qaninnerpaami ataatsimeeqatigiittussaavugut, isornartorsiuisut oqaaseqartartuat, Anders Olsen oqarpoq.

Qanorlu ingerlaqqittoqassanersoq pillugu annerusumik maannakkut oqaaseqarsinnaanani ilanngullugu oqarpoq.

- Tassa taakkua isummersorfiginissaat tullissaanimut apersorneqarnissatsinnut ilanngutissallugit isumaqarpunga. Massakkut siusippallaarpoq.

Karl-Kristian Kruse: Tusarniaaneq ataqqineqartariaqarpoq

Isornartorsiuisut arfineq marluk naammaginninnginnertik tamanut saqqummiummassuk, Siumup immikkoortortaqarfii Kim Kielsenimik siulittaasutut tatiginninnersut pillugu tusarniarneqalerput.

Immikkoortortaqarfinni 61-iusuni 40-t tusarniaanermut akissuteqarput, taakkunanilu 34-t Kim Kielsenimik tapersersuipput.

Immikkoortortaqarfinnilu amerlanerussuteqartut Kim Kielsenimik tapersersuinerat ataqqineqartariaqartoq, partiip siulittaasuata tullia Karl-Kristian Kruse isumaqarpoq.

AAMMA ATUARUK Ulloq aalajangiiffiusoq: Siumut Kim Kielsenip siunissaa pillugu massakkorpiaq ataatsimiippoq

- Immikkoortortaqarfiit tusarniarneqarnerata ataqqineqarnissaa uatsinnut tamatsinnut pisussaaffiliisoq isumaqarpunga, Karl-Kristian Kruse oqarpoq.

Taanna naapertorlugu, maanna naaperiuteqartoqassaaq.

- Piniakkanut tunngasut, aalisarnermut tunngasut aningaasarsiornermut tunngasut ilaalu ilanngullugit taakkua tatiginninnginnermut tunngavigineqarput. Isumaqarpungalu taakkua pillugit taava pisussaatitsisut uagut siulersuisut aammalu Inatsisartut kiisalu naalakkersuisuutitavut annertunerusumik oqaloqatigiittariaqartugut. Isumaqarpunga taanna aqqutigigutsigu tamatsinnut toqqissisimanartuussasoq, Karl-Kristian Kruse oqarpoq.

Immikkoortortaqarfiit: Kielsen saqqumminerusariaqarpoq

Immikkoortortaqarfinniilli siulittaasumut uparuaasoqarpoq.

Siulittaasumik nutaamik kissaateqanngikkaluarlutik Namminersorlutik Oqartussat illorsuanni sulianik nassuiaanerusarnissaa kissaatigineqarpoq.

- Siulittaasuunera ippinnartinneqanngilaq, kisianni maqaasineqarpoq, inuiaqatigiinnut saqquminnginnera, aammalu suut suliat ingerlanneqarnerannut ersarissaanerusariaqarneranik ujartuiffigineqarpoq. Isumaqarpunga taanna uagut siulersuisuunertut apuukkumaaripput, siulittaasullu taanna naammassiumaaraa, Karl-Kristian Kruse oqarpoq.

Taanna isornartorsiuisut ilaannut politikkikkut kinguneqartitsisoqarnissaa pillugu isummerusunngilaq. Partiimi nuimasut, soorlu Naalakkersuisunut ilaasortaq Erik Jensen aammalu aningaasaqarnermut akileraartarnermullu ataatsimiititaliami siulittaasoq, Hermann Berthelsen isornartorsiuisunut ilaapput.