Akerliussutsimik takutitsisut Kim Kielsen oqalugiarnerani tunukkaat
- Hjemmestyrep eqqunneqarneraniit aqutseriuseq taamatut ingerlanneqartuaannarnera inuttaai allannguinnartarlutik taanna qatsunnarsigami. Inuiaqatigiinnik tusaaniaaneq annikitsuararsuuvoq, sooq taamatut ingerlatsiuassappat, nunatta politikeriinut Nuummi akerliussutsimik aappassaanik takutitseqataasoq Aputsiaq Petersen aperaaq.
Aputsiaq Petersen. Assi: Ane-Marie Petersen, KNR
Akerliussutsimik takutitsisunut eqimattatunut Naammaleqaaq – Nok er nok-imut peqataalluni Inatsisartut silataanni qeqqisimagami sapaatip akunnera ataaseq qaangiuppoq. KNR-ip akerliussutsimik takutitsisunut malinnaatitaata inuit Nuummi akerliussutsimik takutitsijartortut ikinnerpaamik 1000-iussasut naatsorsorpai, taakkulu Inatsisartut silataanni ”Naammaleqaaq”-mik suaartaateqarput.
Akerliussutsimik ullumi takutitsijartortut kingullermitulli amerlatiginngillat. Taamaakkaluartorli atsiornernik katersukkami inuit 1300-t atsiorsimapput, tassanilu ima oqaasertaqarpoq:
”Naligaluta sullinneqartariaqarpugut napparsimaveqarfiit, meeqqat, meeqqanik sullissisut, inissaaleqisut siulliunneqartariaqarput namminerlu pisariaqartitaat kingulliunneqarlutik. Inuinuku sullinniarlugit Naalakkersuisuusut.”, skivunder.net/naammaleqaaq-mi atsiorfissami allassimavoq.
Akuerisinnaanngikkaat
Aappaagumut aningaasanut inatsit tallimanngormat akuerineqarpoq – aningaasanut inatsit akerliussutsimik takutitsiartortoqarneranik kinguneqarpoq. Akerliussutsimik takutitsisut akitsuutit nutaat sioraasat, mamakujuit. Imigassat tupallu akitsornerannik ilaatigut kinguneqartoq aningaasanut inatsimmi amigartooruteqarnermut matussutaaniarput.
Akerliussutsimilli takutitsisut akitsuutit nutaat kisimik kamaatiginngilaat. Akitsuutilli kamaammerluni naammagittaannarumajunnaassutigineqarput.
AAMMA ATUARUK Ilisimasalik akerliusut pillugit: Kim Kielsen ernumassutissaqanngilaq
- ”Nunatta aqunneqarnera naammagilerparput! Akitsuutit inuiaat akissakinnerit akunnattumillu isertitallit eqqorneqarput - tamannalu akuerisinnaanngilarput. Aqutseriuseq allanngornissaa piumasaralugu una atsiortitsinerup siunertarivaa”, akerliussutsimik takutitsisut atsiortitsinernik Naalakkersuisunut tunniunniagaani allassimavoq.
Anders Meilvang
Akerliussutsimillu takutitsisut ilaata, Anders Meilvangip tamanna isumaqatigilluinnarpaa.
- Politikki maanna ingerlanneqartoq naapertuilluanngilaq. Tamarmi innuttaasunut akissaatikinnerusunut sunniuteqarpoq, taanna oqarpoq.
- Akissaqarnerusut akileraaruserneqarlutillu akitsuusiiffigineqarsinnaagaluarput. Nunarput nunarsuarmi nunani naligiinnginnerpaasoqartunut ilanngukkiartulerpoq. Akitsuutit naammagittaannarsinnaannginnermut aallarniipput- akitsuutit tamanut eqquinerat ilumoorpoq, kisianni pissakinneroreersut eqqugaanerpaapput, Anders Meilvang oqarpoq.
Kim Kielsen Inatsisartut silataanni akerliussutsimik takutitsisunut oqaaseqarpoq. Assi: Ane-Marie Petersen
Akerliussutsimik takutitsisut atsiornernik Kim Kielsenimut Inatsisartut silataanniittumut tunniussipput. Akerliussutsimilli takutitsisut tunuaqqusillutit kissaateqarnertik puiguinnarsinnaagaat, Kim Kielsenip oqaatigaa.
- Akerliussutsimik takutitsinernit naatsorsuutigineqassanngilaq Naalakkersuisut tunuassasut. Inatsisartuni aaliangikkat najoqqutaralugit suliat ingerlanneqarumaarput. Innuttaasut qinersereeraangata innuttaasut najoqqutaralugit ingerlanneqartarput amerlanerussuteqarnikkullu aaliangikkat pisarlutik, Kim Kielsen oqarpoq.
AAMMA ATUARUK Akerliussutsimik takutitsisut inatsisissaq akuerineqareermat: Pakatseqqallutalu kamaqqavugut
Københavnimi Christianshavns Slotspladsimi eqimattat nunatsinni akerliunerup nalaani aamma akerliussutsimik takutitsipput.
