Ilisimasalik akerliusut pillugit: Kim Kielsen ernumassutissaqanngilaq
- Inuiaqatigiit kamattorujussuullutillu isornartorsiorujussuarput, Ilisimatusarfimmi inuiaqatigiilerinermi adjunkti, Rasmus Leander Nielsen oqarpoq.
Nunatsinni sumiiffinni assigiinngitsuni pingasunngornermi novembarip ulluisa 20-anni akerliussutsimik takutitsinermi ”Naammaleqaaq”-mi inuit 1000-init amerlanerusut peqataapput. Ullumilu novembarip ulluisa 27-anni aamma akerliussutsimik takutitsisoqaqqissaaq.
AAMMA ATUARUK Akerliussutsimik ullumi takititsisoqaqqilersoq
Inatsisartut mamakujunnut, tupanut imigassamullu pilertortumik ilaatigut akitsuusiinerat pillugu akerliussutsimik takutitsisoqarpoq.
Akitsuusersuineq aaqqiipallaanertut atuutsilerneqartoq inuiaqatigiinnut assut kamammik pilersitsivoq
Mittarfiliornerit, ingerlatsiviit akileraarutaannik appaanerit meeqqanut atugassarititaasunit Naalakkersuisunit pingaartinneqarnerusut akerliusut aamma isumaqarput. Inuppassuit naammagiliillutik ingerlaaqatigiikkaluartut aningaasanut inatsit tallimanngormat akuersissutigineqarpoq, tassa akerliusut tusaaniarneqanngillat. Kim Kielsenilu Naalakkersuisut siulittaasoqarfianni suli issiavoq.
Akerliusut amerlisut
- Kalaallit Nunaanni uranimut allanulluunniit akerliussutsimik takutitsisoqartarnera takornartaanngilaq. Akitsuusersuinerlu aaqqiipallaanertut atuutsilerneqartoq inuiaqatigiinnut assut kamammik pilersitsivoq, Rasmus Leander Nielsen oqarpoq.
Kim Kielesenilli Naalakkersuisullu inuiaqatigiit akornanni eqqiissiviilliortoqarnera ernummatigisariaqanngikkaat taanna isumaqarpoq.
Akerliussutsimik takutitsisut ilaat, akerliussutsimik takutitsinermi Inatsisartut saannut sioraasanik kuisivoq.
- Ukiup imaalernerani akerliusoqalernera Kim Kielsenimut iluaqutitaqarpoq. Inatsisartut ukiaanerani ataatsimiinnerat naammassereermat inuiaqatigiit akerliunerannik atorluaanissamut illuatungiliuttut tunngavissaarutereerput, taanna oqarpoq.
AAMMA ATUARUK Akitsuutit nutaat pillugit akerliussutsimik takutitsisut: Naammaleqaaq!
- Isornartorsiuinerit piunnassaappata akerliusullu illoqarfinni assigiinngitsuni amerliartuinnassappata pisoq annertoorujussuanngorsinnaavoq. Piffissamili sivikitsumik taamaatoqassappat sunniuteqangaarunnanngilaq. Ukiaq tamaat eqqarsaatigalugu Kim Kielsenip inissisimanera ajornerulinngilaq.
Kim Kielsen Naalakkersuisullu Inatsisartut ukiaanerani ataatsimiinneranni aalassattaqattaanngaatsiarput.
Siumumi aporaannersuaqartoq
- Inatsisartut ukiaanerani ataatsimiinnissaat suli allartinngitsoq Siumumi eqqissiviilliortoqalerpoq. Kim Kielsenilu ulorianartorsiuleraluarluni, Rasmus Leander Nielsen oqarpoq.
- Partiip iluani suli aaqqiagiinngittoqarpoq, illuatungiliuuttunullu atassuteqarneq suli ajorsiartuinnarluni.
Nunarsuarmiooqataasut politikkikkut suliaqartunut aamma akerliussutsimik takutitsinerit sakkortuut aqqusaarneqaqattaarput – soorlu Hong Kongimi amerikallu kujataani.
Kim Kielsen ulorianartorsiulissappat susoqartariaqarpa?
- Qaqugu pisut naammalissanersut oqaatigiuminaapput, Rasmus Leander Nielsen oqarpoq.
AAMMA ATUARUK Akerliussutsimik takutitsisut inatsisissaq akuerineqareermat: Pakatseqqallutalu kamaqqavugut
- Akerliusulli illoqarfinni assigiinngitsuni amerlaneruleriartornissaat pisariaqarpoq – Demokraatilli Naalakkersuisooqatigiinnut ikinnerussuteqartunut tapertaajunnaassappata.
Kingullerli piviusunngornissaa ilimaginngilaa – qinersisoqarnissaami maanna piumaneqanngilaq.
- Partiit minnerit, soorlu Atassut Suleqatigiisitsisullu qinerneqaqqinnissartik qulakkeersinnaanngilaat. Siumumi aporaattoqarpoq, Inuit Ataqatigiit nutaamik siulittaasortaaqqammeramik politikkikkut toqqammavissartik suli inissivinngilaat. Taavalu Demokraatinit Niels Thomsen tunuaqqammerpoq taakkulu aamma inissinniaqqaartussaassapput. Tassa partiit tamarmik ataatsimut isigalugit ingerlalluanngillat, Rasmus Leander Nielsen oqarpoq.
- Taamaammat qinersisoqarnissaa isumassarsiatsialattut isigineqarunanngilaq.
Naammaleqaaq, Nuummi sapaatip akunnerata siuliani akerliussutsimik takutitsisut nilliapput.
