Nunatsinni sumiiffinni qassiiusuni sapaatip akunnerata siuliani pingasunngornermi akerliussutsimik takutitsisoqarpoq.Assi: Malik Brøns, KNR

Akerliussutsimik ullumi takititsisoqaqqilersoq

Akitsuutit Naalakkersuisullu pillugit akerliussutsimik takutitsinissamut aaqqissuisut politikerinit tusaaneqarsimanngitsutut misigisimapput, taamaammat inuiaqatigiit akerliunerat ullumi pingasunngornermi ingerlanneqaqqissaaq.

Akerliussutsimik takutitsisut tassa Naammaleqaaq – Nok er nok Naalakkersuisunik Inatsisartunillu ilorrisimaannginnerminik ullumi pingasunngornermi nalunaaqutaq 16.30 takutitsiniarput. Piffissami tassani Danmarkimi Københavnimi akerliussutimik aamma takutitsisoqassaaq.

Nunatsinni sumiiffinni qassiiusuni Naalakkersuisunut Inatsisartunullu pingasunngormat kingullermik akerliussutsimik takutitsisoqarpoq. Nuummi akerliussutsimik takutitsiartortut 1000-init amerlanerusut takkupput. Inatsisartut aningaasanut inatsimmik ataqatigiissitsiniarlutit mamakujunnut, tupanut imigassamullu akitsuutinik qaffaanerat akerliunermi ilaatigut pissutaapput.

AAMMA ATUARUK Akitsuutit nutaat pillugit akerliussutsimik takutitsisut: Naammaleqaaq!

Akerliussutsimilli takutitsineq kingulleq naammanngilaq.

Akerliussutsimik takutitsinissamut aaqqissuussisut politikerit tusarnaarsimanngitsut isumaqarput, tamanna pissutigalugu akerliunerat ullumi nangeqqinneqassaaq.

- Ersarissumik naammaleqaamik suaartartugut isumaqarpunga. Aqutseriaaseq ullormiit ullormut inatsimmik allannguuteqartarneq naammatsiffigaarput. Taama aqutseriaaseqarnermut isigittuuginnarsinnaanngilagut, tamanna naammatsiffigaarput, aaqqissuussisut sisamat ilaat, Pipaluk Lynge Rasmussen oqarpoq.

Danmarkimut siaruaattoq

Naak aningaasanut inatsit akuerineqareeraluartoq akerliusoqarnissaanut aaqqissuisut Naalakkersuisunit tusarneqarnissartik neriuutigaat. Naalakkersuisut mittarfinnut pilersaarutinik suliffeqarfiillu akileraarutaannik appaanermik akuerineqaqqammersumik pingaarnerutitsillutik nunatsinni meeqqanik pingaarnerutitsinngitsut, Pipaluk Lynge Rasmussen isumaqarpoq.

- Minnerpaamik inatsimmik allannguisoqarnissaa kissaatigaarput. Politikerit manngertisimaalutit tunuarnianngikkunik aningaasaqarnermut inatsimmik allannguisoqarnissaa piumasaraarput, taamaalillutit innuttaasut tusarneqartutut misigissapput, Pipaluk Lynge Rasmussen oqarpoq.

AAMMA ATUARUK Tupanut akitsuusiineq aningaasanut inatsisip amigartooruteqarneranut matussusiissasoq

Akerliussutsimik takutitsineq tamatumuuna nunatsinni kisimi ingerlanneqassanngilaq. Københavnimi Christianshavns slotspladsip eqqaani eqimattat Naalakkersuisunut aamma akerliussutsimik takutitsiniarput.

- Politikerit taama aqutsinerat pissutigalugu Danmarkimi ilinniartorpassuit nunatsinnut uternissartik qularutigigaat nalunngilarput. Taamaammat ilinniartut aamma ”politikerit suleriaasertik allanngortittariaqaraat” takutikkusullugu tusarneqarusupput, Pipaluk Lynge Rasmussen oqarpoq.

Københavnimi akerliussutsimik takutitsineq danskit nalunaaqutaat naapertorlugu 20.30 aallartissaaq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat