27-nik ukiullip nalliunnini nalliussivaa – akunnialuillu qaangiummata arnamik toqutsilluni

Ukiut arfineq-marluk qaammatillu arfinillit pineqaatissinneqarsimasunut inissiisarfimmiittussanngortinneqarpoq.

Angutip 27-nik ukiullip Nanortalimmeersup toqutsisimasutut, angerlarsimaffimmi eqqissiviilliortitsisimasutut, kannguttaatsuliorsimasutut, aserorterisimasutut meeqqamillu 15-it inorlugit ukiulimmik kujannissimasutut unnerluutigineqarneqarnerani Eqqartuussisoqarfik Kujalleq taama eqqartuussuteqarpoq.

Angut pissutsit amerlanerpaartai pinngitsuunerarfigai – taamaakkaluartorli eqqartuussut akuerigaa, unnerluussisussaatitaasoq, Cecilie Stürup Sørensen KNR-imut oqarpoq.

Angut siorna februaarip 17-ianni inuuissiorpoq. Angut 27-liivoq, ullorlu nalinginnaasutut aallartippoq, ilaquttanit ikinngutiniillu pilluaqquneqarpoq. Illooqqanilu peqatigalugu unnukkut festerpoq.

- Angut silaarulluni aalakoorsimavoq, aamma hashimik pujortarsimavoq, naak imerniarnani ilaquttaminut neriorsuutigisimagaluarlugu, Cecilie Stürup Sørensen angutip eqqartuussivimmi nassuiaataa pillugu oqarpoq.

Imerniartarfimmi Hotel Kap Farvelimi ilaatigut festersimapput. Unnerluussisussaatitaasullu oqarnera naapertorlugu inuit 14-it eqqartuussivimmi ilisimannittutut nassuiaateqarput, nakorsaq eqqartuussivinnut misissuissussisartoq aamma timip kingornussaanut tunngasunik misissuisartoq aamma nassuiaateqarput. Ilisimannittutut nassuiaateqartut 14-it ilarpassui ullormi akissarsiffiusumi Hotel Kap Farvelimiissimapput.

Eqqaamasaqanngitsoq

27-nik ukiulik februaarip 18-iata unnuaata ingerlanerani – tassa unnuap qeqqata kingorna – arnaq utoqqasaaq naapinniarsimavaa naleqqutinngitsumillu pissuseqarsimasoq, ilisimannittutut nassuiaateqartoq eqqartuussivimmi nassuiaavoq.

Ullaakkut tallimat missaani Nanortalimmi angerlarsimaffimmut, arnap 59-inik ukiullip najugaanut isersimavoq. Tamatumalu kingorna arnaq sinittarfimmi kannguttaatsuliorfigalugu siffiaata nalaasigut attuualaarsimavaa. Arnap angut anisissimavaa angutillu illumut igalaaq silamiit aserorsimallugu.

27-nik ukiulik eqqaamasaqarsimannginnini pissutigalugu nassuerumanani oqarpoq.

Toqutsineq eqqartuussutigineqartoq februaarip 18-ianni ullaakkut nalunaaqutaq tallimat arfineq-marlullu akornanni aamma pivoq. Angut ima sakkortutigisumik arnamut 65-inik ukiulimmut nakuuserlunilu annersaasimasutut eqqartuunneqarpoq, allaat arnap ajoqusernini issinneralu toqukkut qimagunneranik kinguneqarlutik. Toqutaasoq niaqqumigut timimigullu arlalinnik innarlerneqarsimavoq.

Arnap DNA-va angummi nassaarineqarpoq – pingaartumik kiinaani kukiisalu ataanni. Angut arnamik toqutsisimasutut eqqartuussivimmi pinngitsuunerarpoq, angut nakuusersimannginnerarpoq – arnalli DNA-va qanoq ililluni angummiilersimanersoq aperineqarami arnaq ikiorniarsimagaluarlugu akissutigaa.

Ilisimannittutut nassuiaateqartut 65-inik ukiulimmik toqutsinermik takunnissimanngillat, 27-nilli ukiullip aappakua eqqartuussivimmi nassuiaateqartoq unnerluussisussaatitaasup ”pingaarutilittut” oqaatigaa.

- Taassuma angut ullaakkut arfernup missaani angerlarsimaffimminukarsimasoq oqaatigaa. Angut sakkortuumik kasuttorsimavoq, illumullu iserami assai aattaqarsimapput. Aappakuata oqarnera naapertorlugu angut ima oqarsimavoq: ”Immaqa annersaasimavunga, immaqalu toqutsisimallunga”.

- Arnaq ersilersimavoq, taassumalu anaanani peqatigalugu angut illumit anisippaat. Tamatumalu kingorna takoqqinnagu, Cecilie Stürup Sørensen oqarpoq.

Heliportimi tigusarineqartoq

Nanortalimmi politiit arnamik 65-inik ukiulimmik nunami toqungasumik nassaartoqarsimasoq sapaammi ullaap tungaani nalunaaqutaq 9.53 kalerrinneqarput. 27-nik ukiulik heliportimiittoq akunnialuit qaangiuttut tigusarineqarput. Angut aqaguani kilisaammut ikiniarsimavoq.

27-nik ukiulik pinerluuteqarneq ilungersunarluinnartoq alla pillugu aamma unnerluutigineqarpoq – tassa niviarsiaqqamik aqqaneq-marlunnik ukiulimmik kujannissimasutut. Unnerluussissut naapertorlugu angut ”aqqaneq-marlunnik ukiullip naak ukiui ilisimagaluarlugit” 2024-mi januaarip arfineq-aappaani kujannissimasutut unnerluutigineqarpoq. Politiit oqarnerat naapertorlugu tamanna unnuami nalunaaqutaq marluk pingasullu akornanni pisimavoq.

Angutip niviarsiaqqamik atoqateqarsimaneq nassuerutigigaa niviarsiararli qassinik ukioqarnersoq apereqqaarsimanagu taamaalillunilu kinguaassiutitigut atoqateqarsinnaanermut ukiut killissarititaasut 15-it qulakkeeqqaarsimanagit nassuiaatigigaa unnerluussisussaatitaasup oqaatigaa.

27-nik ukiulik tigusarineqaramili tigummigallarneqalerpoq, taannalu Eqqartuussisoqarfik Kujallermi unnerluussissutigineqartuni tamani ippassaq eqqartuunneqarluni. Angut unnerluussisussaatitaasut piumasaqaateqarneratulli pineqaatissinneqarpoq – tassa ukiut arfineq-marluk qaammatillu arfinillit.

- Angut arnamut 65-inik ukiulimmik annertuumik – aamma toqoreernerata kingorna nakuusersimasutut eqqartuunneqarpoq. Unnerluutigineqartoq imigassartorsimavoq, arnarlu 65-inik ukiulik toqutaasoq angullu pisoq sioqqullugu imminnut atassuteqarfigisimanerannut takussutissaqanngilaq. Suliami matumani pinerliffigineqarnera nalaatsornerinnakkut pisimasoorpasippoq, Cecilie Stürup Sørensen, oqarpoq, taassumalu eqqartuussut naammagisimaarpaa.

27-nik ukiulik pineqaatissinneqarnermi saniatigut toqutaasup meeraanut inersimasumut ataatsimut taarsiissuteqartussanngortinneqarpoq aamma meeqqamik 15-it inorlugit ukiulimmik kujannissimasutut pissutsimilu kannguttaatsuliornermi taarsiissuteqartussanngortinneqarpoq.