Arnaq toqutaasoq eqqaaniarneqartoq: Illoqarfeerarput allaanngilaq tarrajuttoq

Arnaq 65-inik ukiulik toqungasoq Nanortalimmi sapaatiummat nassaarineqarpoq. Pisoq innuttaasut attortissutigeqaat, sapaatiummallu eqqaaniaallutik naneruutinik ikitsipput.

Allattoq Hanna Vestergaard Hviid

februaarip 20-at 2024 14:20

- Attortisimarrateqaagut annerusumik minnerusumillu. Illoqarfeerarput mikinermik soorlu misigisimanarluni tarrajuttoq. Illoqarfeerarput mikinermik tamatta immitsinnut nalunnginnatta.

Nanortalimmiu Nuka Korneliussen oqarpoq. Taanna Nanortalimmi arnap 65-inik ukiullip sapaatit-akunnerata siuliata naanerani toqutaasup angerlarsimaffiata silataani sapaatiummat unnukkut eqqaaniaasoqarnerani aaqqissuisuuvoq.

Eqqugaasunut misiginneqataanissaq pingaartillugu naneruutinik ikitsisoqartoq taanna oqarpoq.

- Arlaatigut iliuuseqartariaqartutut misigisimagama facebookikkut peqatissarsiorpunga, Nuka Kornerliussen.

Aamma atuarukAngut 27-nik ukiulik Nanortalimmi toqutsisimasutut ulluni 28-ni tigummineqarallartussanngortinneqartoq

Nanortalimmi sakkortuumik pisoqarnera nunaqqataasunut misigissutsikkut sakkortuvoq, naneruummillu ikitseqatigiinneq iluaqutaasimassasoq Nuka Korneliussenip neriuutigaa.

- Immitsinnut oqilisaaqatigiinniarluta taamaaliorpugut. Ilaqutaasut oqilisaaffigalugit, uagullu immitsinnut oqilisarluta misiginneqatiginninnerput takutillugu, taanna oqarpoq.

Arnaq 65-inik ukiulik Nanortalimmi silami toqungasoq sapaatiummat nassaarineqarpoq. Takussutissallu aallaavigalugit pinerluttoqarsimaneranik pasinartoqartoq politiit nalunaarput. Angut 27-nik ukiulik arnamik toqutsisimasutut pasineqarluni sapaammi ullup-ingerlanerani tigusarineqarpoq.

Angut ulluni 28-ni tigummigallagassanngortinneqassasoq Eqqartuussisoqarfik Kujalleq ataasinngormat aalajangiivoq. Angut toqutsisimasutut pasineqartoq pinngitsuunerarpoq.

Innuttaasut pisariaqartitsisut oqaloqateqarsinnaasut

Nanortalimmi pisoq sakkortummat Kommune Kujalliup aaqqissugaannik Nanortalimmi ilaqutariit illuat oqaloqatiginninnissamik pisariaqartitsisunut ammatinneqarpoq.

Sapaatillu akunnera tamaat saaffiginnittoqarsinnaavoq.

- Pisoq eqqugaasut nunaqqataasunullu tupannaqaaq imaannaananilu, Kommune Kujallermi isumaginninnermut pinaveersaartitsinermullu pisortap tullia Tina Abildgaard oqarpoq. Namminerlu aamma ullup-ingerlanerani Nanortalimmukarniarpoq.

- Suleqatikka Nanortalimmiittut peqatigalugit nalilersueriarluta qanoq ingerlariaqqissanersugut pilersaarusiussavarput.

Sakkortuumik pisoqarsimatillugu oqaloqatiginnittartut Nanortalimmiinneranni atorluarneqassasut kommunimit kaammattuutigineqarpoq.