Angut 27-nik ukiulik arnamik Nanortalimmi toqutsisimasutut unnerluutigineqartoq

Angut pinerluummi allami ilungersunartumi aamma unnerluutigineqarpoq – tassa niviarsiaqqamik aqqaneq-marlunnik ukiulimmik kinguaassiutitigut kujannissimasutut aamma 59-inik ukiullip angerlarsimaffianut iseriarluni kannguttaatsuliorsimasutut unnerluutigineqarpoq.

Allattoq Christine Hyldal (non-activated)

januaarip 27-at 2025 14:11

Nutserisoq Connie Fontain

Angut 27-nik ukiulik Qaqortumi Eqqartuussisoqarfik Kujallermi sapaatip akunnerani matumani unnerluutigineqarpoq, taanna pinerluuteqarnerni ilungersunarnerpaat ilaanni – tassa arnamik 65-inik ukiulimmik toqutsisimasutut unnerluutigineqarpoq.

Toqutsineq Nanortalimmi siorna februaarip 18-iani pivoq. Politiit Nanortalimmi arnamik toqungasumik silami siumuisimasumit ullaap-tungaani – nalunaaqutaq 9.53 kalerrinneqarput.

Unnerluussissut naapertorlugu arnaq nakuuserfigineqarnini - issinneralu pissutigalugit nalunaaqutaq ullaakkut tallimat arfineq-marlullu akornanni toqusimavoq.

Angut 27-nik ukiulik ulloq taanna tigusarineqarpoq, tamatumalu kingornali tigummigallagaaginnaavissimalluni.

27-nik ukiulik ullaami tassani pinerluuteqarnerit arlallit pillugit aamma unnerluutigineqarpoq. Angut unnerluussissut naapertorlugu 59-inik ukiullip Nanortalimmi najugaanut igalaaq ikerseqqasoq aqqutigalugu isersimavoq. Unnerluussissut naapertorlugu illumi ”ilagaat sakkortuumik tilluarsimavai taamaasillunilu isaarissap igalaava aserorlugu”.

Illoqarfimmi tupaqqasoqartoq

Danmarkimi Pinerluttoqartillugu Misissueqqissaartarfimmit aamma Toqusut Imaannik Misissuisarfimmit sulisut suliamik misissueqqissaarnermi ikiuukkiartorput, politiillu februaarip 18-ianni sapaatip unnuami imerniartarfimmi Hotel Kap Farvelimi silataaniluunniit takunnissimasussarsiorput.

2024-mi toqutsinerit tallimat aaku

Nanortalimmi februaarimi: Arnaq 65-inik ukiulik silami nassaarineqarpoq.

Tasiilami apriilimi: Utoqqaat aappariit. Aappaata aappani toqoriarlugu kingorna imminut toquppoq.

Nuummi maajimi: Arnaq 36-nik ukiulik savimmik kapineqarluni toqunneqarpoq.

Nuummi oktobarimi: Angut 20-nik ukiulik toqungasoq inissiaqarfimmi nassaarineqarpoq.

Tiilerilaami novembarimi: Angut 33-nik ukiulik aallaaneqarluni toqunneqarpoq.

Nanortalimmi tupaqqasoqarpoq, toqutaasorlu pillugu eqqaaniaanermik aaqqissuussisoqarluni.

- Attortisimarrateqaagut annerusumik minnerusumillu. Illoqarfeerarput mikinermik soorlu misigisimanarluni tarrajuttoq. Illoqarfeerarput mikinermik tamatta immitsinnut nalunnginnatta, Nuka Korneliussen eqqaaniaanermik aaqqissuussisoq oqarpoq.

Aamma atuarukArnaq toqutaasoq eqqaaniarneqartoq: Illoqarfeerarput allaanngilaq tarrajuttoq

27-nik ukiulik toqutsisutut unnerluutigineqarnermi saniatigut pinerluummik ilungersunarluinnartumik – tassa niviarsiaqqamik aqqaneq-marlunnik ukiulimmik kujassissimasutut aamma unnerluutigineqarpoq. Unnerluussut naapertorlugu angut 2024-mi januaarip arfineq-aappaani ”12-inik ukiullip ukiui ilisimagaluarlugit kujannissimasutut” aamma unnerluutigineqarpoq. Politiit oqarnerat naapertorlugu tamanna unnuami nalunaaquttap marluk pingasullu akornanni pivoq.

27-nik ukiullip ukiuni arfineq-marlunni qaammatinilu arfinilinni pineqaatissinneqarsimasunut inissiisarfimmiittussanngortinneqarnissaa piumasaraat.

Nunatsinni siorna toqutsinerit tallimaapput. Taakku amerlassusaat ukiut tamaasa toqutsinerit agguaqatigiissinnerisa amerlassuseraat.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.