23-nik ukiulik Fieldsimi toqutsisimasutut eqqartuunneqartoq
Angut 23-nik ukiulik pisiniarfeqarfissuarmi Fieldsimi siorna arlalinnik toqutsisimasutut toqutseriarsimasutullu tarnikkut napparsimasunut napparsimmavimmut isumannaallisavissukkamut Sikringenimut inissinneqartussatut eqqartuussaavoq, iperagaanissaalu ullulerneqarani.
Københavnimi eqqartuussivik pingasunngornermi taama aalajangiivoq.
Unnerluussut, ilaatigut pingasunik toqutsisimanermik arlalinnillu toqutseriarsimanermik imaqartoq, malillugu angut pisuutinneqarpoq. Aallaasersorneq pilersaarutaasimasoq eqqartuussivik naliliivoq.
Tarnikkut napparsimasunut inissiisarfik isumannaallisarluagaq
Angut aallaasersunnginnermini Fieldsip isaariaanik ersarilluinnartumik misissuisimanera taama naliliinermut tunngaviusoq, eqqartuussisut siulittaasuat Jens Stausbøll oqarpoq.
Nalunaarsuinerit assammik allakkat 23-nik ukiullip angerlarsimaffiani aallaasersornerup kingorna nassaarineqartut eqqartuussinermi aamma pingaartinneqarput.
23-nik ukiulik aallaasersorniarluni pilersaarusiorsimammat sulilu ulorianarmat tarnikkut napparsimasunut inissiisarfimmut isummannaallisarluakkamut Sikringsafdleingenimut inissinneqartariaqarnerarlugu suliap ingerlanerani unnerluussisussaatitaasuuneq Søren Harbo tunngavilersuivoq.
Inissiisarfik Slagelsemiippoq, Sikringenimillu taaneqartarluni.
Taanna tarnikkut napparsimasunut inissiisarfik parnaarussivimmut isumannaallisarluakkamut assinguvoq, tarnikkullu napparsimasunut inissiisarfinnut nalinginnaasunit sulisoqarneruvoq pinngitsaaliissumillu qanoq iliuuseqartoqarnissamik periarfissaqarneruvoq.
"Isikkut isigivaanga"
23-nik ukiulik eqqartuussummik suliareqqitassanngortitseqqissanerluni eqqarsarnissamut periarfissaminik kissaateqarpoq. Taanna eqqartuussummik Østre Landsrettimut sapaatit-akunnerisa marluk ingerlaneranni suliareqqitassanngortitsisinnaavoq.
23-nik ukiulik ukiup ataatsip matuma siorna aallaasersulermat kalaallit arlallit Fieldsimiipput. Taakku ilagaat Sara Brandt, taanna perusuersartarfimmi minutsit qulit 15-illu akornanni toqqoqqavoq.
Taanna ikinngutinilu Royal Arenami Harry Stylesip tusarnaartitsineraniittussaagaluarput.
Anja Taunajiup Tasiilameersup angut aallaasersortoq pisiniarfeqarfissuup silataani miiterialuinnanik ungasitsigivaa.
- Nuivoq aallaasisarluni, syv meteringajannik ungasitsigaluni isikkut isigivaanga, taanna KNR-imut siorna juulip qulingani oqarpoq.
- Tassani eqqarsarpunga killissara tikillugu, neriuuteqanngilanga. Tupinnaannartumik meeqqama kiinai sarsuasut isigaakka.
Sekundialuit qaangiummata politeerpassuit aallaasilisartut nuipput nilliallutik angullu nunamut palloqqullugu.