Sara Brandt Fieldsimi perusuersartarfimmi minutsit 15-ingajaat toqqoqqasoq
Sara Brandt Københavnimi pisiniarfissuarmi, Fieldsimi perusuersartarfimmi minutsit qulit 15-illu akornanni toqqoqqavoq.
Taanna 22-nik ukioqarpoq Nuummilu najugaqarluni, taanna ikinngutinilu Royal Arenami Harry Stylesip tusarnaartitsineraniittussaagaluarput. Taakku pisiniarfissuarmi ualikkut pisiniarfileralutillu nerisimapput.
Fieldsimi aallaasersortoqarnera ataatsimut isigalugu:
Københavnimi politiit pisiniarfissuarmi Fieldsimi aallaasersortoqartoq sapaammi nalunaaqutaq 17.36 (danskit nalunaaqutaat) nalunaarfigineqarput.
Politiit oqarnerat naapertorlugu Fieldsimi sumiiffinni assigiinngitsuni marlunni seqqortoqarpoq.
Inuit pingasut toqutaapput. Nukappiaraq niviarsiararlu 17-inik ukiullik kiisalu angut russitut innuttaassuseqartoq 47-nik ukiulik Danmarkimili najugaqartoq.
Tamatuma saniatigut inuit sisamat aamma eqqorneqarput. Taakkunannga ataaseq peruluppoq.
Inuit allat 23-t aallaasersortoqarnerani aamma ajoqusersimapput.
Politiit angut 22-nik ukiulik danskisut innuttaassuseqartoq aallaasersortoqarnerata kingorna tigusaraat.
Angut ataasinngornermi inatsit tunngaviusoq naapertorlugu killisiorneqarpoq.
Nalunaaqutaq 17.36 pisiarfissuup quleriiaavisa qullersaanni neripput. Tamatuma kingorna perusuersartarfimmukarput, tassaniinnerminnilu inuit silataani nilliasut tusaasinnaavaat.
- Kisinngoruteriataaratta WC-mi, arnat WC-anni. Taava ilagisakka marluk, angalaqatikka alakkaagamik uanga WC-miiginnarama ingerlaannaq uterlutik "aallaasersortoqarpoq" oqaatigaat, Sara Brandt oqarpoq.
AAMMA ATUARUK Lars Therkelsenip politiit sakkulersorsimallutik Fieldsip saaniittut takugai
- Tupaasalluta uppererpiarnagu. WC-t tamarmik paarnaaqqaleriataaramik, ataasiinnaq ammasoq iluatseqqarlugu WC-mut mattulluta immaqa 10-15 minutsit tassani mattuteqqavugut. Eqqaralaatsinni seqqortaarpalungaatsiarpaluttoq.
Nipaarsaarluinnarlutillu qiasut
- Perusuersartarfiit naqqani ammaneqarput, iserlunilu ammaneratigut aammaanissaa annilaanganartorujussuuvoq. Allaannginnami perusuersartarfiit tikikkunigit nassaarissagaatigut
Nipaarsaarluinnarlutik utaqqipput.
- Soorunami annilaangallutalu pissangavugut. Tupaqqavugut. Allamik iliuuseqarsinnaanngilagut. Qiavugut, kisianni nipaarsaarlutalu oqaluunnaveersaarpugut. Taamnna ajornerpaavoq, Sara oqarpoq.
Qujanartumik ikuallattuunermini kalerrisaarut aallartippoq, taamaalillutik Sara ikinngutinilu ikuallattuulernermi anisarfikkut perusuersartarfiup sanianiittukkut aniartorsinnaalerput.
Ikinngutit ilaquttallu oqaloqatigaat
Inuit pingasut aallaasersortoqarnerani toqutaapput. Inuit sisamat aallaaneqarput, taakkunanngalu ataaseq peruluppoq. Politiit angut danskiusoq tigusaraat. Inuit 23-t aallaasertoqarneranut atatillugu ajoquserput.
Angut ullaap tungaani inatsit tunngaviusoq naapertorlugu killisiorneqarpoq, pingasunillu toqutsisutut arfineq-marlunnillu toqutseriartutut pasineqarluni.
AAMMA ATUARUK Inuusuttut marluk angullu inersimasoq Fieldsimi toqutaapput
Københavnip Kommuniani ikiuigasuarnissamik upalungaarsimaneq aallartippaa, Sara ikinngutaalu aamma neqeroorfigineqarput.
- Nalaatsinerluttunut ikiueqqaarnermut neqeroorutit assigiinngitsut takuagut, tutsaqarsinnaasugut pisariaqartitsigutta. Uagulli taakkununnga tutsaqanngilagut. Ilaquttagut nalunngisagut aniatitsiffigalugit misigisatsinnik oqaluttuullugit taanna iluaqutigingaatsiarparput.
- Ajornerussappat soorunalimi immitsinnut paasillualaariarluta tamakku attavigiumaarpagut. Suli Tupaqqalaaratta.
