Pisianiarfeqarfissuarmi Fieldsimi aallaasersortoqarneranut atatillugu misissuinerit killiffiat pillugu chefpolitiinspektøri Søren Thomassen ataasinngornermi ullaakkut nassuiaateqarpoq.Assi: Martin Sylvest/Ritzau Scanpix

Inuusuttut marluk angullu inersimasoq Fieldsimi toqutaapput

Fieldsimi toqutaasut pingasut tassaapput inuusuttut marluk 17-inik ukiullit, angullu Ruslandimiusut innuttaassusilik 47-nik ukiulik. Taakkua saniatigut qallunaat marluk svenskisullu innuttaassusillit marluk peruluttut napparsimmavimmi uninngavianniipput.

Københavnimi pisiniarfeqarfissuasrmi Fieldsimi sapaammi unnukkut aallaasersortoqarnerani inuit pingasut toqutaasut tassaapput inuusuttut marluk inersimasorlu.

Tassaapput niviarsiaraq nukappiararlu 17-inik ukiullit angullu 47-nik ukiulik, Ruslandimiutut innuttaassusilik, Danmarkimilu najugalik.

Københavnip politiivini chefpolitiinspektøri Søren Thomassem tusagassiortunik ataasinngornermi ullaakkut katersortitsinermi taama ilisimatitsivoq. Inuit sisamat allat aamma eqqorneqarput.

Qallunaatut innuttaassusillit marluk, arnaq 40-nik ukiulik, arnarlu 19-inik ukiulik, svenskisullu innuttaassusillit marluk, angut 50-inik ukiulik, niviarsiararlu 16-inik ukiulik. Tamarmik perulupput, aniguissagunarlutilli, chefpolitiinspektøri oqarpoq.

Inuit arlallit allat aamma ajoquserneqarput.

Inuit pingasut aallaaneqarlutik toqutaasut Søren Thomassenip oqaatigaa. Sisamat ikilerneqangaatsiartut aamma aallaaneqarsimapput, ajoqusertullu sinneri aallaaneqarsimanatik, taanna oqarpoq.

- Nalaatsortumik eqqorneqarsimasutut nalilerpagut. Kikkuunerat apeqqutaatinnagu eqqorneqarsimapput, politiinspektøri oqarpoq.

Videoliat assillu siammarterneqannginnissaat kaammattuutigineqarpoq

Eqqorneqarsimasut pillugit videoliat siammarterneqanngissaat chefpolitiinspektørip kaammattuutigaa.

Aallaasersortoqarnerata kingorna angut 22-nik ukiulik politiinit tigusarineqarpoq. Søren Thomassenip oqarnera naapertorlugu killisorneqareerpoq, tarnimikkullu nappaatillit katsorsarneqartarfianni aamma ilisimaneqarluni.

Pilersaarusiukkamik saassussisoqarneratut isikkoqartoq politiit nalilerpaat.

- Taama peqqarniitsigisumik saassussisoqarnissaanik pilersaarusiortoqarsimaneranik takussutissaqarpoq, Søren Thomassen oqarpoq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl