Lars Therkelsenip politiit sakkulersorsimallutik Fieldsip saaniittut takugai
- Politiit biilerpassuit politiillu pisuinnartut aallaaseqartut takkussuupput. Inuppassuit katersuupput politiillu taakku allamukassasut suaartarput. Pissanganartorujussuuvoq.
Lars Therkelsen Københavnimi Fieldsip saniani ippassaq akunnittarfimmiittoq taama oqarpoq.
Københavnip Politiivi Københavnimi Amagarimiittumi pisiarfissuarmi Fieldsimi aallaasersortoqartoq danskit nalunaaqutaaq malillugu sapaammi ualikkut ualikkut nalunaarfigineqarput.
Inuit pingasut toqutaapput politiillu angut danskiusoq 22-nik ukiulik tigusaraat.
Fieldsimi aallaasersortoqarnera ataatsimut isigalugu:
Københavnimi politiit pisiniarfissuarmi Fieldsimi aallaasersortoqartoq sapaammi nalunaaqutaq 17.36 (danskit nalunaaqutaat) nalunaarfigineqarput.
Politiit oqarnerat naapertorlugu Fieldsimi sumiiffinni assigiinngitsuni marlunni seqqortoqarpoq.
Inuit pingasut toqutaapput. Nukappiaraq niviarsiararlu 17-inik ukiullik kiisalu angut russitut innuttaassuseqartoq 47-nik ukiulik Danmarkimili najugaqartoq.
Tamatuma saniatigut inuit sisamat aamma eqqorneqarput. Taakkunannga ataaseq peruluppoq.
Inuit allat 23-t aallaasersortoqarnerani aamma ajoqusersimapput.
Politiit angut 22-nik ukiulik danskisut innuttaassuseqartoq aallaasersortoqarnerata kingorna tigusaraat.
Angut ataasinngornermi inatsit tunngaviusoq naapertorlugu killisiorneqarpoq.
Ikerasanneersoq, Lars Therkelsen nulianilu aallaasersortoqarnerata nalaani Fieldsimut isikkivilimmiipput. Taassuma inuit Fieldsip eqqaani suaartalersut siullertut maluginiaqqaarsimallugu oqaatigaa.
Taassuma nuliatalu ullormi tassani kingusinnerusukkut pisiarfissualiarnissaq pilersaarutigisimagaluarpaat.
- Ippassaq Fieldsimiippugut, Fieldsimut filmeriarlutalu neriartorsinnaanissarput pilersaarutaagaluarpoq. Ersiummernarpoq, Lars Therkelsen aallaasersortoqaqqammernerani KNR-imut oqarpoq.
Lars Therkelsen nulianilu akunnittarfimmiittut allat peqatigalugit akunnittarfitsik qimassanngikkaat aallaasersortoqareernerani ilisimatinneqarput.
Taamaalillutik akunnittarfimmi inigisaminniit silami susoqarneranik malinnaaffigisinnaavaat.
Angut 22-nik ukiulik aallaasersortoqarnerata kingorna tigusarineqartoq politiit oqarnerat naapertorlugu ’tarnikkut nappaatilinnut napparsimmavimmi ilisimaneqarpoq’. Politiit misissueqqissaarnerat angut aallaasersornermi kisimiissimasoq tamannalu pilersaarusioreersimagaat takutippaat.
Danmarkimik inatsit tunngaviusoq naapertorlugu killisiuineq danskit nalunaaqutaaq naapertorlugu nalunaaqutaq 13.00 aallartinneqarpoq.
DR-ip killisiuineq matoqqasuunerarpaa, tassa imaappoq tusagassiorfiit tamallu misissueqqissaarnermi annikitsortat paasisinnaatitaanngikkaat.
Tamatuma saniatigut angut pasineqartoq toqutaasullu pingasut aqqi oqaatigineqaqqusaanngillat.
