Nuummi inuit aallaasersortoqarnera pillugu: Tamatta sapaatiummat Fieldsimiittumik ilisarisimasaqarpugut
Københavnimi pisiniarfissuarmi angut sapaatiummat aallaasersormat inuit pingasut toqutaapput inuillu sisamat ikilingaatsiarneqarlutik.
Aallaasersortoqarnera nunatsinni tamarmi annilaassutigineqarpoq. Amerlasuut aasaanerani Danmarkimukarput, KNR-illu Nuuk Centerimi naapitai tamarmik sapaatiummat Fieldsimiittumik ilisarisimasaqarput.
- Nalunngisakka qimaanerminni sunaaffa aallaasersortup tungaanut qimaasoorsimagaluarlutik paasilerlugu illuatungaanut arpaannaq qimaasimapput, Ulrik Blidorf oqarpoq.
Tusarlugit tamakkua illillu nalunngisaralugit qanoq ippa?
- Neriuppunga, naalagaaffiup iluani Danmarkip, Kalaallit Nunaata aammalu Savalimmiuni pisortaqarfiit tarnimikkut nappaatilinnut iluamik sullissisoqarnissaa massakkut qiviartariaqalerpaat, iluamillu katsorsaasoqarnissaanut aningaasaliisariaqalerput, Ulrik Blidorf oqarpoq.
Angut 22-nik ukiulik tarnimikkut napparsimasunut immikkoortortaqarfiup matoqqasuani ulluni 24-ni paarineqartussanngorlugu ippassaq inissinneqarpoq. Angut inunnik pingasunik toqutsisutut inunnillu arfineq-marlunnik toqutseriartutut pasineqarpoq. Taassuma tigusarineqarnermini qoorortooq savillu tigummiarpai.
Uju Petersen sakkortuumik pisoqarnerani Fieldsimiittumik aamma nalunngisaqarpoq:
- Ilaquttatta ilaat piffissami tassani isilerluni paasivaa taamatut pisoqartoq,
- Qujanartumik toqqissisimallutik sillimaniartoqarsimammat, paasitippaatigut toqqissillutik isumagineqartut, Uju Petersen oqarpoq.
Nivikka Olsen aamma nalunngisaqarpoq:
- Tupannarpoq assorujuk, misigissutsit tamaasa pigivakka, Nivikka Olsen oqarpoq.
- Aap, nalunngisakka taakaniissimapput qujanartumillli pisoqanngilaarnerani ingerlasimapput, aammalu nalunngisara alla anialeruttornerisa nalaanni apuussimagaluarpoq inuppassuit qimaasimallutik silataaneerrattut apuuffigalugit, Nivikka Olsen oqarpoq.
- Iserfigisarnikuullugu assorsuaq eqqarsariaammerpunga, taamak sakkortutigisumik taamallu sivikitsigisumik pisoqarnera amiilaarnartutullu misigivara, K Ole Olsen oqarpoq.
Fieldsimi aallaasersortoqarnera ataatsimut isigalugu:
Københavnimi politiit pisiniarfissuarmi Fieldsimi aallaasersortoqartoq sapaammi nalunaaqutaq 17.36 (danskit nalunaaqutaat) nalunaarfigineqarput.
Politiit oqarnerat naapertorlugu Fieldsimi sumiiffinni assigiinngitsuni marlunni seqqortoqarpoq.
Inuit pingasut toqutaapput. Nukappiaraq niviarsiararlu 17-inik ukiullik kiisalu angut russitut innuttaassuseqartoq 47-nik ukiulik Danmarkimili najugaqartoq.
Tamatuma saniatigut inuit sisamat aamma eqqorneqarput. Taakkunannga ataaseq peruluppoq.
Inuit allat 23-t aallaasersortoqarnerani aamma ajoqusersimapput.
Politiit angut 22-nik ukiulik danskisut innuttaassuseqartoq aallaasersortoqarnerata kingorna tigusaraat.
Angut ataasinngornermi inatsit tunngaviusoq naapertorlugu killisiorneqarpoq. Angut taanna tarnikkut nappaatilinnut immikkoortortaqarfimmi matoqqasumi ulluni 24-ni tigummigallagassanngortinneqarpoq.
- Facebookimi atuarpara, Kalaallit ilaqutariit erngutsisartut taakaniissimapput pisoqanngitsialaarneranilu erngutaa klapvognini sinittoq itersimavoq assullu anerusulluni qialersimalluni, anereerlutik hovedbanegårdimut apuuttullu taamatut pisoqartoq paasisimavaat, K Ole Olsen oqarpoq.
Uju Petersenip pisiniarfeqarfissuaq aallaasersorfiusoq Danmarkimukaqqikkuni orneqqissanerlugu maanna eqqarsaatigaa:
- Taamatut pisoqareernerata kingorna nuliaralu eqqartorparput soorluuna taakunngaqqinnissarput orniginarpallaarunnaartikkipput pisormi amiilaarnaqimmat. Kisianni tassa nunarsuatsinni pissutsit taamaapput, Uju Petersen Kommuneqarfik Sermersuumi Inuit Ataqatigiinnit kommunalbestyrelsimut ilaasortaq oqarpoq.
Aallaasersortoqarnera pisiniarfissuarmi uivertoqarneranik pilersitsivoq. Inuppassuit pisiarfissuup anisarfiatigut qimarrapput, ilaallu pisiniarfinni toqqorterlutik.
Politiit aallaasersortoqarnera pillugu nalunaaqutaq 17.35-ip missaani siullermik nalunaarfigineqarput.
Angut 22-nik ukiulik pisiniarfissuup silataani nalunaaqutaq 17.48 tigusarineqarpoq – politiillu oqarnerat naapertorlugu tigusarinninnerat ”pissanganartorsiuallaanngilaq”.
Angut tarnimikkut napparsimasunut immikkoortortaqarfiup matoqqasuani ulluni 24-ni tigummigallagassanngortinneqarpoq.
Angutip 22-nik ukiullip unnerluutiginninnerit qanoq oqaaseqarfiginerai naluneqarpoq, inatsimmi tunngaviusoq naapertorlugu killisiuisoqarnerani matut eqqartuussisumit matuneqarput.
