Anja Taunajiip Fieldsimi toqoraasutut pasisaq qanimorpaa: Eqqarsarpunga killissara tikillugu
51-inik ukiullip Anja Taunajiip Tasiilameersup Fieldsip saninnguani hotellimi najugallip, sapaammi ualikkut pujortariartilluni uivernersuaqalermat ulloq eqqissilluni atugaa naalliunnermik taarserneqarpoq.
Inuit arpaliutilermata Anja Taunajik aappanilu isumaqaraluarpoq ikuallannermik kalerrisaarut asuli toorneqarsimasoq imaluunniit sungiusartoqartoq. Taamaammat hotelimi ineeqqaminit ammukarpoq pujortariarniarluni. Susoqarneranik soorlu taama inoqartigineranik paasiniaassalluni saaffiginnittarfimmut aallartorlu inuit 20-it missaanniittut arpallutik hotellimut isaapput.
- Isaasut nilliapput ”Aallaarsersortoqarpoq! Aallaasersortoqarpoq!” Uippallerlunga qimarrattut arpaqatigilerpakka. Perusuersartarfik saneqqukkatsigu matut parnaartitserpaluttut tusaavakka. Kisianni toqqissisimanarinnginnakku arpallunga aneqataavunga, Anja Taunajik oqarpoq.
Fieldsimi aallaasersortoqarnera ataatsimut isigalugu:
Københavnimi politiit pisiniarfissuarmi Fieldsimi aallaasersortoqartoq sapaammi nalunaaqutaq 17.36 (danskit nalunaaqutaat) nalunaarfigineqarput.
Politiit oqarnerat naapertorlugu Fieldsimi sumiiffinni assigiinngitsuni marlunni seqqortoqarpoq.
Inuit pingasut toqutaapput. Nukappiaraq niviarsiararlu 17-inik ukiullik kiisalu angut russitut innuttaassuseqartoq 47-nik ukiulik Danmarkimili najugaqartoq.
Tamatuma saniatigut inuit sisamat aamma eqqorneqarput. Taakkunannga ataaseq peruluppoq.
Inuit allat 23-t aallaasersortoqarnerani aamma ajoqusersimapput.
Politiit angut 22-nik ukiulik danskisut innuttaassuseqartoq aallaasersortoqarnerata kingorna tigusaraat.
Angut ataasinngornermi inatsit tunngaviusoq naapertorlugu killisiorneqarpoq. Angut taanna tarnikkut nappaatilinnut immikkoortortaqarfimmi matoqqasumi ulluni 24-ni tigummigallagassanngortinneqarpoq.
Qimaaffissaq hotellip pujortartarfianut aniffissaq annivigaat, biilillu unittarfiatigut arpallutik assiaquttat tungaanukarput. Ilani orpikkat tungaanukartut Anja Taunajik pisuinnaat aqqutaanni unippoq.
- Anernera ajortimmat unikaallappunga, inuillu allat ungasinnerulaami illuarannguup tunuani toqqorsimasut takuakka.
AAMMA ATUARUK Sara Brandt Fieldsimi perusuersartarfimmi minutsit 15-ingajaat toqqoqqasoq
Biilit unittarfiata isaariaata aqquserngullu akornatigut, toqqorsimasut allat tungaannut aallarlunilu angut pasineqartoq 22-nik ukiulik saamimminiit meterialunnik qanitsigaluni nuisimasoq, Anja Taunajiip takuaa.
- Nuivoq aallaasisarluni, syv meteringajannik ungasitsigaluni isikkut isigivaanga, alarakku qitornama kiinai tamaasa takusinnaavakka. Qummut ammullu aallaaniarluni sioorasaarivoq, aallaanngilaanga. Aallaasini maangaannaq eqippaa, Anja oqarpoq.
Qanoq ingerlaqqinnerluni Anja Taunajiip eqqaamanngilaa, arpannanili eqqaamavaa. Ujarak cementerlu toqqorfissaasinnaasut takullugit eqqaamavaa.
Taakku akornannut toqqorpoq, angut suli eqqannguaminiittoq.
- Tassani eqqarsarpunga killissara tikillugu, neriuuteqanngilanga. Tupinnaannartumik meeqqama kiinai sarsuasut isigaakka.
Sekundialuit qaangiummata politeerpassuit aallaasilisartut nuipput nilliallutik angut nunamut palloqqullugu.
Oqiliallanneq neriuuteqalernerlu
Politeerpassuit eqqaminiilermata neriuut oqiliallannerlu takkupput. Politeeq qaninneq tre meterit missaannik qanitsigaaq.
- Angut pallorpallammat mianersorlunga qummut qiviarpunga. Politiip takullunga suaarpaanga tuaviinnaq qimaguteqqullunga.
- Politiit eqqanniilermata neriuuteqalerpunga aallaaneqarnaviarnanga.
AAMMA ATUARUK Nuummi inuit aallaasersortoqarnera pillugu: Tamatta sapaatiummat Fieldsimiittumik ilisarisimasaqarpugut
Anja Taunajik nikuikkami arpassalluni eqqarsaraluarpoq, arpassinnaananili. Pisulluni aallartippoq, kingornalu aqullaarluni.
- Qujanartumik orninniakkama ikiorpaannga nikuisillunga allamukaallungalu.
Anja Taunajiip Fieldsip saninnguani pisuinnaat aqqutaanni pisoqarfiusumiittoq. Angut pasineqartoq sapaatiummat tassani siumoriataarpaa. Assiliisoq: Alice Sørensen
Kingorna qimaasut ornitani peqatigalugit Anja Taunajik Royal Arenap eqqaanukartinneqarput akunnerillu tallimat missaanni tassaneereerlutik hotelimukaanneqarlutik.
- Hotelerisarput iserfigineqarsinnaanngilaq inuillu aneqqusaanatik. Mobileqarnangalu akiliutigisinnaasannik nassataqannginnama aappara suli hotelimiittoq attavigisinnaanngilara. Kisianni qujanartumik inuit eqqanniittut ikiuukkumatoqaat.
Anja Taunajik hotelimi allami unnuivoq aqaguanilu aappaata aavaa. Taassuma inuit ikiuukkumanerat assut qujamasuutigaa.
Takornartat ikiuukkumasut
Unnuiffimminit aappani oqaloqatigaa, aqaguanilu aatilluni. Ullut pingajuanni tarnip pissusaanik ilisimasalimmit nammineq oqaatsini atorlugit ikiorasuarneqarpoq.
- Aapparma attaviginiarnerani qallunaap ikiorpaannga messengerikkut allaffigalugu, Finlandimiup angutip hotelissannik akiliuppaanga nunaqqatittalu ilaata ikiuigasuarnermik misilittagaqartup oqaloqatigaanga aamma pisoqarfiusoq takusaqqikkakku ilagivaanga, taanna oqarpoq.
Pisoq amiilaarnartoq kingunerluuteqartitsivoq.
Pisup kingorna Anja Taunajik ulluni marlunni sininngilaq, annilaangaqqajaajuarpoq nipinullu malussarilluni.
AAMMA ATUARUK Qimassanngilaanga: Jensine Fieldsimiit uinilu qimaanermini taama eqqarsarpoq
- Tusaasaqalaaraangama tupattarpunga, illartoqaraluarpalluunniit. Qujanartumillu ikiorserneqarluarpunga, paasitinneqarlungalu pisoq oqaluttuarisaqattaarukku aamma iluaqutigissallugu.
Anja Taunajik aappanilu hotelerisaminnit allamut nuupput pisoqarfik eqqaamasallu sakkortuut inuit pingasut toqutaaneranik kinguneqartut ungasilliniarlugit.
Anja Taunajik feeriareerluni uteruni tarnip pissusaanik oqaloqateqarnissamik neqeroorfigineqarpoq.
Inuppassuit Fieldsip silataanut aallaasersortoqareernerani naasortaliipput. Assi: Scanpix
