Ilisimatuut nalunaarusiartik illersoraat: Oqaatsit Kalaallit Nunaanni pissaaneqarnermut apeqqutaanngillat
![](/sites/default/files/styles/image_934x467/public/article_images/morten_og_anton.jpg?itok=pDusO8td)
Kalaallit Nunaanni pissaanillit nalunaarsorneranni inuit pissaanilittut toqqakkat inuttut ilisarisimasaasa oqaatsitigullu piginnaasaasa misissorneqarsimannginnerat isornartorsiorneqarpoq.
Pissaanilinnik nalunaarsuinermik isorinnillutik KNR-imut oqaaseqartut tassaapput, politikkukkut alapernaatsut,Martha Labansen aamma Kuupik V. Kleist.
Ilisimatuulli nalunaarusiortut, Morten Fischer Siverthsen Roskilde Universitetimeersoq kiisalu Anton Grau Larsen Copenhagen Business Schoolimeersoq, suliartik illersorpaat.
AAMMA ATUARUK Pissaaneqarneq pillugu nalunaarusiaq isorineqartoq: Amigaateqaqalunilu qallunaarpaluppallaaqaaq
Paasissutissat tamarmik nalunaarsuivinni naatsorsuusivinnilu tamanut ammasuni pineqarput – soorlu Suliffeqarfiit Qitiusumik Nalunaarsuiviat, tassa Det Centrale Virksomhedsregister – CVR-imik taaneqartartoq, Kalaallit Nunaannilu suliffeqarfiit tamarmik tassani nalunaarsorneqartarput. Namminersorlutik Oqartussani, kommunini, kattuffinni, siulersuisuni inuit nalunaarsorneranni atassuteqaqatigiittarfiit 456-it ilanngunnearput.
”Kalaallit Nunaanni inuit pissaaneqarnerit” qanoq inissisimanerat erseqqissarneqarpoq
Kalaallit Nunaanni inuit pissaaneqarnerpaat qanoq inissitsitersimanerannik misissuinermi, atuuffiit atassuteqaqatigiiffiillu nalinginnaasumik ilisimaneqartut pillugit paasissutissat aallaavigineqarput – taakkualu Inatsisartunut, Naalakkersuisunut, siulersuisunut, kattuffinnut, siunnersuisoqarfinnut, ataatsimiititalianut il.il. tunngasuupput.
Kikkut timersoqatigiittarnersut, kaffisoriaqatigiittarnersut aalisariaqatigiittarnersulluunniit imaluunniit kikkut ilaqutariinnersut misissuinermi sunniuteqaataanngilaq.
Inissitsiterinermi inuit kalaallisut, qallunaatut imaluunniit marluinnik oqaaseqartuunersut aamma sunniuteqaataanngilaq.
.
- Taamaammat oqaatsit paasissutissanik pissarsiniarnermi apeqqutaanngillat. Namminersorlutik Oqartussat kommunillu pillugit paasissutissat kiisalu inatsisinik siunnersuuteqassatilluni inuiaqatigiit akornanni tusarniaavigineqartartut pillugit paasissutissat aamma kalaallisut qallunaatullu pineqarsinnaapput. Taamaammat isornartorsiuinerit amerlanertigut saneqqutaarinerupput, ilisimatuut KNR-imut mailikkut taama allapput.
Ingammik Martha Labansenip, oqaatsit sunniuteqaataatinneqannginnerat isornartorsiorpaa, oqarluni ’qanormi aamma ilisimatuut kalaallisut paasisinnaanatillu kalaallisut oqaasilimmik oqaloqateqanngisaannarnikut’.
Morten Fischer Siverthsenip Anton Grau Larsenillu nassuerutigaat, kalaallisut oqalussinnaannginnertik qallunaatut ilisimatuutut sunniuteqarsimasinnaasoq. KNR-imulli ima oqarput:
- Kalaallit Nunaanni ilisimatusarniaraanni kalaallisut oqalussinnaanissaq piumasaqaataappat, misissueqqissaarnissaraluit soqutiginartut amerlaqisut nalorninartumik tunngaveqarluni akornuserneqarsinnaapput.
Ilisimatuut: Inuit immikkut ilisarisimaqatigiinneri aamma soqutiginarput
Isornartorsiuinermut ilaatigut pissutaavoq, inuit nalunaarsorneqartut suliffiup avataani imminnut ilisarisimanersut misissorneqannginnerat.
Kalaallit inuiaqatigiit akornanni kikkut pissaaneqarnerannut tamakkua apeqqutaasinnaasut, Martha Labansen aamma Kuupik V. Kleist isumqarput.
Kikkulli suliffiup avataani imminnut qanoq ilisarisimanersut ilisimatuussutsikkut nalunaarsoruminaattut, Morten Fischer Siverthsen aamma Anton Grau Larsen isumaqarput. Tamakkua ilisimatuut periusianni ilanngunneqanngillat.
AAMMA ATUARUK Nunatsinni inuit pissaaneqarnerpaat 123-t imminnut ima attuumassuteqartut
Tamatumali misissorluarnissaa soqutiginarsinnaasoq, taakkua nassuerutigaat.
- Atassuteqaqatigiittarfiit inuit namminneq akorniminni atugaasa misissornissaasa pingaaruteqarnerat aamma nassuerutigaarput, tamatumanili misissuinissamut pitsaanerusumik pilersaaruteqartoqartariaqarpoq, assersuutigalugu inunnut akulerulluni itisuumik apeqqarissaartarnerit atorneqartariaqassallutik, ilisimatuut KNR-imut allapput.
”Kalaallit Nunaanni inuit pissaaneqarnerpaat" pillugit nalunaarusiaq Transparency International Greenland kiisalu Ilisimatusarfik suleqatigalugit pilersinneqarpoq.