Nunatsinni inuit pissaaneqarnerpaat 123-t imminnut ima attuumassuteqartut
Nunatsinni inuit pissaaneqarnerpaat kikkorpiaappat?
Taakku tassaapput atassuteqaqatigiittarfiit amerlanerpaartaanni peqataasut.
Ilisimatuut marluk Kalaallit Nunaanni pissaaneqarnerpaat pillugit nalunaarusiaanni tamanna erserpoq.
Atassuteqaqatigiittarfinni assigiinngitsuni arfineq-pingasuni pissaanillit amerlanerpaartaannit peqataaffigineqartoq tassaavoq VL Gruppe 72 Nuuk. Taanna suliffeqarfiutillit katersuuttarfigaat.
Aamma inuussutissarsiorneq pillugu ukiumoortumik ataatsimeersuartarneq, Future Greenland, Aningaasaqarnermut Siunnersuisoqatigiit kiisalu Namminersorlutik Oqartussat suliffeqarfiutaanni siulersuisut ukiumoortumik isumasioqatigiittarnerat atassuteqaqatigiittarfinni peqataaffigisaminni pissaaneqarnerpaanut ilaapput.
AAMMA ATUARUK Nunatsinni pissaaneq inunnut amerlasuunut agguataaqqavoq
Inuit pissaaneqarnerpaat atassuteqaqatigiittarfiini arfineq-pingasuusuni katersuuffiunerpaasuni peqataasut tassaapput, Naalakkersuisut siulittaasuat Kim Kielsen (S), naalakkersuisoq Karl Frederik Danielsen (S), naalakkersuisoq Vittus Qujaukitsoq (NQ), Visit Greenlandip pisortaanera Julia Pars, Grønlandsbankenip pisortaanera Martin Birkmose Kviesgaard aamma Sulisitsisut pisortaat Brian Buus.
Pissaaneqarnerpaalli inunnik tusaamasaarpianngitsunik aamma ilaqarput: Taakku ilagaat Naalagaaffiup aningaaserivissuani, tassa Nationalbankenimi siunnersorti Anders Møller Christense aamma Ineqarnermut Attaveqaqatigiinnermullu Naalakkersuisoqarfiup pisortaa Ruth Lindhardt.
AAMMA ATUARUK Nalunaarusiaq: Kalaallit Nunaanni inuit pissaaneqarnerpaat aajukua
Nunatsinni inuit pissaaneqarnerpaat nalunaarusiaq naapertorlugu 123-upput.
Taakkuali amerlanerpaartaat atassuteqaqatigiittarfinni sisamaannarni peqataapput. Siulersuisuni ilaasortaanertik, qullersaqarfinnut siunnersuisoqatigiinnut attuumassuteqarnertik imaluunniit Inatsisartunut Folketingimulluunniit qinigaanertik pissutigalugit atassuteqaqatigiittarfinni peqataapput.
Ilisimatuut marluk Kalaallit Nunaanni pissaaneqarnerpaat pillugit nalunaarusiortut assiliartaq ataaniittoq suliaraat.
Inuit atassuteqaqatigiittarfinni ikinnerpaamik sisamani peqataasut tamarmik assiliartami erserput. Ilaat atassuteqaqatigiittarfinni assigiinngitsuni arfineq-pingasuni aamma peqataapput. Atassuteqaqatigiittarfiit assiigiinngitsut, taakkualu imminnut qanoq attuumassuteqarnersut assiliartami ersersinneqarpoq.
Inuit atassuteqaqatigiittarfiit amerlanerpaartaanni peqataasut assiliartap qeqqani nalunaarsoqqapput.
Inuit pissaaneqarnerpaat akornanni kina pissaaneqarnerpaanersoq ilisimatuut Morten Fischer Sivertsen aamma Anton Grau Larsen oqaatigineqarsinnaanngilaq.
Inuk pissaaneqarnerujussuanngikkaluarluni atassuteqaqatigiittarfippaalunni peqataasinnaavoq. Pissaaneqarnerpaat atassuteqaqatigiittarfiit assigiinngitsut aqqutigalugit imminnut qanoq ilisarisimasariinnersut assiliartami takutinneqarpoq.
Eqqumaffigiuk: Ilisimatuut, Anton Grau Larsen aamma Morten Fischer Sivertsen, misissuinerminnut atatillugu 2019-imi februaarip aallaqqaataaniit 2020-mi februaarip aallaqqaataata tungaanut nalunaarsuipput.
Atorfiit ataasiakkaat allanik tamatuma kingorna inuttaqalertut assiliartami nalunaarsorneqanngillat. Tamanna soorlu Naalakkersuisut paarlaannerannik siulersuisuniluunniit ilaasortat allanik taarserneqarnerannik peqquteqarsinnaavoq.
