Nunarput tikeraagassani nuannerunarnerpaani qulini siuttuusoq
![Visit Greenland Visit Greenland](/sites/default/files/styles/image_934x467/public/article_images/kayaking-outside-qeqertarsuaq-naer-icebergs_10133923554_o.jpg?itok=GQClf2Ra)
Rough Guides nittartagaavoq Tuluit Nunaanneersoq atuakkanik angalanermut tunngasunik angalaffissani 120-nit ikinnerunngitsuni saqqummersitsisarpoq nunanilu 60-ini angalanissamik pilersaarusiortarluni.
Nittartakkap tassani nunat tikeraassallugit nuannerunarnerpaat qulit allattornearsimapput, tassanilu Nunarput siuttuuvoq Japan aamma Thailand aappaattut pingajuattullu inissisimallutik.
Rough Guidesip Nunarput nunarsuarmi qeqertat annersaattut ukiuunerani timersuutinik atuiffissatut piukkunnartutut nittarsaappaa. Pinngortitami kusanarluinnartumi ujakkaartoqarsinnaasoq ilaatigut allaaseraa:
- Aamma iluliarsuit akornisigut qajartortoqarsinnaavoq immallu naqqani takusassarsiorluni aqqartoqarsinnaalluni. Sukkalisaarnermik nuannarisaqartuugaanni qamuteralannik attartortoqarsinnaavoq imaluunniit pinngortitami qimussertoqarsinnaalluni, Rough Guides allappoq.
Nunarput nunarsuarmioqatitsinnit malugineqartoq
Taamaasilluni apriilip qaammataani aappassaa Nunatsinni takornariaqarnerup iluani nersualaarinnittoqarpoq.
Apriilip aallartinnerani Flight Networkip, nunarsuarmi nittartakkatigut angalatitseqatigiiffiit annersaasa ilaat, Canadamiunit pigineqartup, Visit Greenland 2017-imi Nunarsuarmi Takornariaqarnermut Siunnersuisoqatigiinni pitsaanerpaat 20-t ilaattut toqqarpaa.
- Kalaallit Nunaat takornariarfigissallugu ajornakusoortuuvoq, taamaattorli Visit Greenlandip iluatsittumik tikeraarfissat assigiinngissusaat takutilluarpaa, isimut takujuminartunik nittarsaassinermik tunngaveqartumik aammalu paasiuminartumik pilerinartumillu misigisassat attaveqaatitigut siammarternerisigut - angalasunut assigiinngiiaaqisunut saaffiginnittumik suliaqarsimasoq, Flight Network Visit Greenlandimik toqqaanermini ilaatigut taama tunngavilersuuteqarpoq.