Wangenheim: Nioqqutissat peqqinnanngitsut akitsuutaannik qaffaanerup sunniutaanik naliliinissaq siusippallaarpoq
Sikaritsit, imigassat, mamakujuttut sukkullu akitsuutaat qaffannissaat Inatsisartunit siorna akuersissutigimmassulli pisisartut taakkuninnga atuinikinnerulinngillat. Tamanna nunatsinni niuertarfeqarfiit annerpaat pingasut kisitsisaataanni erserpoq.
Nioqqutissalli peqqinnanngitsut akitsuutaannik qaffaanerup sunniuteqannginnissaanik inerniliinissaq maanna siusippallaartoq, peqqissutsimut naalakkersuisoq Anna Wangenheim oqarpoq.
Coronap ajornartoortitsinera inuillu angalanatik nunatsinniiginnarnerat atuinermut niuertarfeqarfiillu tunisaannut sunniuteqarsimasinnaasut, taanna erseqqissaavoq. Imali nangilluni:
- Isumaqarpunga nioqqutissat peqqinnanngitsut akitsuutaannik qaffaanerup allannguinerullu sunniutaannik naliliisoqartuartarnissaa pingaaruteqartoq.
Tunisat taamaaginnartut
Pisisartut nioqqutissanik peqqinnanngitsunik taakkua akitsuutaasa qaffannerisigut atuinikinnerulernissaat pillugu politikkikkut anguniagaq iluatsissimarpasinngitsoq, niuertarfeqarfiup Pilersuisup pisortaa Brian Chemnitz KNR-imut septembarimi oqarpoq.
- Tunisavut ataatsimut isigalugit taamaaginnarput, taanna oqarpoq.
AAMMA ATUARUK Nioqqutissat peqqinnanngitsut akitsuusiiffigineqarnerat pisisartunut tunuarsimaartitsinngitsut
Tassa imaappoq, innuttaasut nioqqutissanik peqqinnanngitsunik atuinikinnerulernissaat peqqinnerulernissaallu neriuutigalugit taakkua akitsuutaasa qaffannerisigut politikkikkut anguniagaq maannamut iluatsinngitsoorpoq.
Mamakujuttut akitsuutaat 2015-imi aamma qaffanneqarput. Taamaaliornerlu peqqinnerulernissamut aqqutissaagunanngitsoq, Anna Wangenheimip arajutsisimanngilaa.
Pisisartummi nioqqutissanik peqqinnanngitsunik akitsuinermut sungiussilertortut, Brugsenip tuniniaanermut pisortaa KNR-imut septembarimi oqarpoq.
Sukkunut immikkut iliuuseqarnissaq pisariaqartoq
Tassami Brugseni Pisiffillu nioqqutissat peqqinnanngitsut akitsuutaannik qaffaanerup kingorna imigassanik, sukkulaanik, mamakujuttunik sukkunillu Pilersuisutulli tunisakinnerulinngillat.
- Isumaqarpunga paasisaminnik saqqummiussinerat sukkut akitsuutaannik qaffaajuartarnissatsinnik aalajangernissatsinnut tunngaviulluarsinnaasut, Anna Wangenheim oqarpoq.
AAMMA ATUARUK Siulittaasoq peqqissuseq pillugu: Sukkunut, aalakoornartunut cigarettinullu akitsuutit kisimik naammanngillat
Innuttaasut sukkulittorpallaarunnaarnissaannut misissueqqissaartoqarnissaa pisariaqarsinnaasoq, taanna nassuiaavoq:
- Taamaammat innuttaasut peqqinnanngitsutorpallaarunnaarlutik peqqinnartutornerulernissaannut immikkut iliuuseqarnissamut qanoq iliornissarput paasiniarlugu nunatsinni nerisaqarnermut inuussutissanullu siunnersuisoqatigiit attaviginiarpakka, taanna oqarpoq.
Anna Wangenheim akitsuutinik qaffaanikkut ukiut sisamat ingerlaneranni 182 millionit koruunit missaannik pissarsinissamut politikkikkut anguniagaq ilumut iluatsissanersoq ilimaginerini aperineqarami, tamanna coronap ajornartoortitsinerani aningaasartuutit 2021-mullu aningaasanut inatsissap suli akuerineqannginnera pissutigalugit akiuminaatsinnerarpaa.
