Nioqqutissat peqqinnanngitsut akitsuusiiffigineqarnerat pisisartunut tunuarsimaartitsinngitsut

Pisisartut nioqqutissat peqqinnanngitsut qaffasinnerusumik akitsuuserneqarnerat pissutigalugu imigassamik, mamakujunnik sioraasanillu annikinnerusunik pisisalinngillat.
- Mamakujuit Haribo siorna novembarinngitsoq tunisatsinnit ikinnerusut tunisalinngilagut, Brugsenip tuniniaanermut pisortaa, Jes Nyborg oqarpoq. Assi © : Brugseni
Allattoq Anders Dall
septembarip 17-at 2020 13:28
Nutserisoq Connie Fontain

Akitsuutit nutaat peqqinnerusumik inuuneqalernissamut kajuminnerulersitsinissamik nunatta karsiata pitsaanerulersinnissaanik siunertaqarput, akitsuutilli Nuummi akerliussutsinik takutitsisiffigineqaqattaarput.

Tamanna Naalakkersuisut nioqqutissanut peqqinnanngitsunut akitsuutinik qaffaanissamik siunnersuutaata Inatsisartunit siorna akuerineqarneratigut ukkatarineqalerpoq.

Akitsuutit nutaat pisisartut cigarettinut, imigassamut, mamakujunnut sukkunullu aningaasartuuteqarnerulernissaannik ilaatigut isumaqarpoq.

Inuiaqatigiilli peqqissusaasa akitsuusiinerunikkut pitsanngorsinneqarnissaannut politikkikkut siunertarineqartoq atuisartut cigarettinik, imigassamik, mamakujunnik sukkunillu annikinnerusumik pisisalinnginnerat pissutigalugu anguneqanngilaq.

AAMMA ATUARUK Aningaasanut inatsit: Sikaritsit, imigassaq, sukkut, sukkulaatit mamakujuttullu akitsorput

  • Akitsuutit nutaat malillugit cigarettit 20-t 82 koruunimit 86,50 koruunimut akitsorput.
  • Sukkut puussiaq kilomut 4 koruunit 31 øremik akisunerulissaaq.
  • Sukkulaatit, mamakujuit kiilumut 5 koruunimik akitsuuserneqassapput.
  • Imigassaq aamma akisunerulissaaq. Imigassallu puiaasaani literimut qanoq annertutiginersoq apeqqutaalluni akitsorneqassalluni. Immiaaraq 33 centiliteriusoq 66 øremik akisunerulissaaq.

    Tusarfik: Brugseni

Akitsuutimmi nutaat atuutilerneranit ukioq ataaseq qaangiukkaluartoq nioqqutissat peqqinnanngitsut akisunerunerat inuit pisisarnermut ileqquinut allannguisimarpasinngilaq.

- Akitsuutit pisisartut pisiarisartagaannut naleqqussaanissamik siunertaqarsimappata siunertarineqartoq anguneqarpasinngilaq. Nioqqutissat tunisartakkatsitut amerlassuseqartut tunivagut, Pilersuisup pisortaa, Brian Chemnitz oqarpoq.

Aamma Brugsenimi akitsuutit qaffannerat nioqqutissallu peqqinnanngitsut akisunerulernerat pisisartut pisiarisartagaannut aamma allannguisimarpasinngilaq.

Inuusaaserput pitsanngorsartariaqarparput, taamaanngippat peqqinnissaqarfimmut suli aningaasartuuteqarnerulissaagut, Kim Kielsen akitsuutit nutaat pillugit 2019-imi novembarip 18-iani oqarpoq.

- 2019-mi aningaasanut inatsimmut atatillugu akitsuutit qaffannerisa kingorna nioqqutissani eqimattat amerlasuut sapaatini akunnerni tulleriinni qanimut malinnaavigaagut. Tunisartakkatsinni allannguisoqangaanngitsoq tassuuna takusinnaavarput, tuniniaanermut pisortaq, Jes Nyborg oqarpoq.

Akitsuutit peqqinnerulersitsissasut

Naalakkersuisut nioqqutissanut peqqinnangitsunut akitsuusiinerulernissamut siunnersuutaat ”Akitsuutit peqqinnerulersitsisussat”-nik taagorneqarput. Siunnersuut 2020-mut aningaasanut inatsisissap isumaqatigiinniutigineqarneranut atatillugu saqqummiunneqarpoq.

Naalakkersuisullu siulittaasuat, Kim Kielsen tassunga atatillugu ilaatigut ima oqarpoq: ”Inuusaaserput pitsanngorsartariaqarparput, taamaanngippat peqqinnissaqarfimmut suli aningaasartuuteqarnerulissaagut”.

AAMMA ATUARUK Ilisimasalik akerliusut pillugit: Kim Kielsen ernumassutissaqanngilaq

Brian Chemnitzilli oqarnera naapertorlugu akitsuutit peqqinnerulersitsisussat Pilersuisup pisiniarfiini tunisanut allannguinngillat.

- Iluaqutaasimappata nioqqutissanik taakkunannga kaaviiaartitatsinnit annaasaqarsimassagaluarpugut, kaaviiaartitallu taakku peqqinnarnerusuni kaaviiaartitaniilersimanissaat neriuutigigaluarpara, Brian Chemnitz oqarpoq.

Pilersuisullu nioqqutissanit peqqinnanngitsunit taakkunannga kaaviiaartitani ataatsimut isigalugu kaaviiaartitariinnarpai.

- Tassa imaappoq sukkut, cigarettit, immiaaqqat, sodavandillu tunisagut ukiup siulianut piffissamut tassunga sanilliullugit amerlaqatigiiginnarput. Tunisagut nalinginnaasumik taamaaginnarput, Pilersuisup pisortaa oqarpoq.

Brugsenimi cigarettinik tupanillu tunisaqarneq ataatsimut isigalugu allanngunngilaq, nioqqutissallu allat akitsuutinit sunniivigineqartut ataasiakkaartut qaffarialaarsimallutik, Jess Nyborg nassuiaavoq.

- Immiaaqqanik, viinik imigassamillu kimittuunik aamma sakkulaatinik mamartunillu nalinginnaasumik tunisaqarneq misissoraanni ataasiakkaani tunisaqarneq 3-5 procentimik qaffariarsimavoq, tuniniaanermut pisortaq oqarpoq.

Sukkunik, cigarettinik immiaaqqanillu amerlaqataanik tunisaqarpugut. Pilersuisup pisortaa 2020-mi septembarip 17-iani oqarpoq.

Taassuma sukkulaatit mamakujuillu ataasiakkaartut kiilumut akitsuuteqarlutik ullumikkut 63 koruuneqartut oqaatigaa. Tassa imaappoq, Matador Mixit 100 gramiusut akitsuuserneqarneri 7 koruuniuvoq.

- Mamakujuit Haribo siorna novembarinngitsoq tunisatsinnit ikinnerusut tunisalinngilagut, Brugsenip tuniniaanermut pisortaa, Jes Nyborg oqarpoq.

Sulinngiffeqarnermi nammineq nunagisamiiginnarneq tunisaqartitsisoq 

Pisiffiup pisortaanerata, Per Steen Larsenip akitsuutinik atulersitsineq nioqqutissanut akisunerulersitsisarmat tamanna tunisaqarnermut nalinginnaasumik sunniuteqarnerluttaraluarpoq. Tamannali imigassamik, sukkulaatinik, mamakujunnik sukkunillu nioqquteqarnermi nalaanneqanngilaq.

Taassuma tamanna inuit aasaq manna nunamut allamut angalanatik nunatsinniiginnarrannerannik pissuteqarsoraa. Per Steen Larsenip oqarnera naapertorlugu cigarettinik tunisaqartarneq kisimi ukiut taamaasa annikilliartortarpoq. Tamannalu pisortap oqarnera naapertorlugu pujortartannginnissamut qaammarsaanermik aamma pissuteqarsinnaavoq.

- Nioqqutissalli allat sunniiviginerlunneqanngillat, pisortaaneq oqarpoq.

Brugsenip coronap ilungersunartorsiortitsinera innuttaasut amerlanerusut marsip qaammataanili nunamut allamut angalatinnagit nunatsinniiginnartikkai aamma nassuiaatigaa.

- Coronamik tassuuna sunnerneqanngivilluta oqaasinnaanngilagut, Jess Nyborg oqarpoq.