Wæver: Siumup naalakkersuinerlunneranut suleqatigiinnginneq pissutaavoq
Naalakkersuisut siulittaasuata, Aleqa Hammondip, Naalakkersuisunik siulersuisinnaannginnera naalakkersuisut sisamat tunuarnerannut pissutaasoq, Inatsisartut siulittaasuat Lars-Emil Johansen isumaqarpoq.
Siumut Partiitut ajornartorsiuteqanngilaq - inatsisartunili ilaasortat suleqatigiissinnaannginnerat ajornartorsiutaasoq, partiimi siulittaasuugallartup Jørgen Wæver Johansenip erseqqissarpaa.
Naalakkersuisut siulittaasorisimasaata, Aleqa Hammondip Nunatta karsianik atornerluisimanera, partiimut Siumumut tutsinniarneqarsinnaanngitsoq, partiimi siulittaasuugallartoq isumaqarpoq.
- Nunatsinni ajornartorsiutit annersaat tassaavoq, inatsisartoqarsimagatta maannakkut imminnut atorunnaarsittunik suleqatigiissinnaanngitsunik aamma nunatta siunissaa pillugu katersuuffeqanngitsunik. Tamannalu allanngortittariaqarpoq, partiimi Siumumi siulittaasuugallartoq, Jørgen Wæver Johansen oqarpoq.
Inatsisartunut siulittaasuugallartoq, Lars-Emil Johansen Naalakkersuisut siulittaasorisimasaata naalakkersuisuminik aqutsisimanera isornartoqartillugu radioaviisimut oqaatigaa.
- Naalakkersuinikkut siuttuussagaanni aalajangersimasumik siunertaqarluni ingerlatsinissaq pisariaqarpoq tamannalu Naalakkersuisut siulittaasuata naalakkersuisuiminik siulersuinissaa pisariaqartoq, Lars-Emil Johansen oqarpoq, - massakkut pisumi takuneqarsinnaavoq siulersuineq taanna naammaginartumik ingerlasimanngitsoq, Inatsisartuni siulittaasuugallartoq oqarpoq.
Naalakkersuisut siulittaasorisimasaata, Aleqa Hammondip nunatta karsianit akiliutsikkallarsimanera partii Siumumut attuumassuteqanngitsoq, partiip siulittaasorigallagaa oqarpoq.
- Isumaqarpunga partii Siumut ajornartorsiuteqanngitsoq, inuiat ataasiakkaat iliuuserisarsimasaat partiimut tamarmut tutsinniarneqarsinnaanngillat, Jørgen Wæver Johansen oqarpoq.
Qinersisartut partii Siumumut tatiginnissuseqalerseqqinneqassappata, suleqatigiinnissaq pingaartinneqassasoq aamma partiinik allanik suleqatiginnittoqartariaqartoq, siulittaasuugallartoq oqarpoq.
- Partii Siumup partiit allat tamaasa suleqatigisinnaavai, aamma inuit ataasikkaat imminnut pingaarnerpaatut immikkut inissikkunnaarlutik, nunarput kateriffittut qineqqusaarnermi sammisariaqarpaat aamma partiit imminnut nassaarisariaqarput, isumaqarpungalu nunatsinni siammasissumik suleqatigiinnissaq nunatta pisariaqartikkaa.
Jørgen Wæver Johansen Siumup ataatsimeersuarnissaata tungaanut siulittaasugallartoq taama oqarpoq.
Siumup immikkut ittumik ataatsimeersuarnissaani, oktoberip 18-anni pisussami, Jørgen Wæver Johansen siulittaasumut qinigassanngortissanerluni suli aalajanginngilaq.
