VM-rtaleqqinnissaq assammik arsartartut sinnattorivaat
Assammik arsarnermi peqataasut amerlassusaat paatsuugassaanngilaq; assammik arsarneq peqataasartut amerlassusaasigut pitsaanerusumik inissisimanikuuvoq.
Nunatsinni pissartanngorniunnermi inersimasut iligiit arfineq pingasuusaraluarput puljenut marlunnut avillutik pissartanngorniuttut.
Maanna assammik arsartartut kattuffiat TAAK periusissiorpoq timersortarfinni assammik arsarnerulernissamik siunnerfilimmik. Siulersuisunilu ilaasortat sineriammeersut peqatigiiffiit unammilligassaat pillugit immersueqataapput.
- Tassani paasinarpoq nammineq piumassutsimik suliniartut, aqutsisut sungiusaasullu sumiiffinni assigiinngitsuni amigaataasut. Tamanna iliuuseqarfiginiarlugu piaartumik suliniutit aallartisarniarpagut, TAAK-mi siunnersorti Jakob Larsen KNR-mut oqarpoq.
Anguniarneqalerpoq sungiusaasut nutaat 60-it ukiut marluk tulliuttut ingerlaneranni ilinniartinneqassasut.
Savalimmiormiut nuannaartorisaapput
Siusinnerusoq eqqarsaatigalugu amerlanerusut assammik arsartalernerisigut anguniarneqarpoq VM-mut annguttaleqqinnissaq taamalu siunissami assammik arsartartussat nuannaartorisaqartillugit.
- Ukiualuilli ingerlareerpata kinguneri takkussulerumaarput. Savalimmiormiut iliuusaat qiviarutsigu taakku ukiut qulit aqqaneq marluk matuma siornatigut ukiukitsuniit aallartipput tassa arfineq pingasut, qulingiluat qulit missaannik ukiulinnik, tamatumalu kinguneri maanna takusinnaalerpagut, Jakob Larsen oqarpoq.
Taamatut oqarnermini eqqarsaatigai savalimmiormiut angutitaat 2024ip aallartilaarnerani tupaallaattaaqisumik Europami pissartanngorniunnermi Norgemut naligiiginnarnerat aammalu decemberimi arnat Europami pissartanngorniummata savalimmiormiut Kroatiamut naligiiginnarlutik.
- Naatsorsuutigaara meeqqat inuusuttuaqqallu amerlasut sineriammi soqutiginnilersissinnaagutsigit soorunami Nuuk mininnagu ilaasortat maanna 1.400-niit ukiualuit qaangiuppata tusintinut arlalinnut amerlisissinnaagivut, Jakob Larsen oqarpoq.
- Assammillu arsartartut amerlanerulerpata ima atitutigisumik arsartoqalersinnaavugut VM-mut annguttaleqqissinnaalluta, Jakob Larsen naggasiivoq.
