Vittus Qujaukitsoq perorsaasut isumaqatiginninniarnerannut: Akuliukkusunngilanga
![](/sites/default/files/styles/image_934x467/public/article_images/vittus_5.jpg?itok=-T3Psin6)
Naak perorsaasut akissarsiatik malunnaatilimmik qaffanneqarnissaat piumasaralugu Inatsisartuni ilaasortanut Naalakkersuisunullu tallimanngormat akerliussutsimik takutitsillutik nilliagaluaqisut, aningaasaqarnermut naalakkersuisup akuliunnissani piffissaasorinngilaa.
Perorsaasut akerliussutsimik takutitsisariaqalersimanerat aningasaqarnermut naalakkersuisup, Vittus Qujaukitsup (NQ), paasilluarsinnaanerarpaa.
- Paasinarpoq persorsaasut aningaasarsiaminnut sulinermilu atukkat pitsanngorsaavigineqarnissaannut kissaateqarnerat, taanna paatsuugassaangilaq.
Isumaqatigiinniarnerilli kattuffiit pisortallu isumaqatigiiniartartuisa ingerlatarisarmassuk perorsaasut isumaqatigiinniarnerat politikkikkut akuliuffigissallugu massakkut piffissaanngitsoq, aningasaqarnermut naalakkersuisoq oqarpoq.
AAMMA ATUARUK Perorsaasut aningaasarsiaginnerujumallutik akerliussutsimik takutitsilersut
Nunatsinni Persorsaasut Kattuffiat oqartussallu perorsaasut akissarsiaat isumaqatigiinniutigileruttorpaat.
- Mianernarpoq isumaqatigiinniarnerit suli ingerlaartut politikkikkut qalleraattumik akuliuffiginiarnissaat, taanna kaammattuutiginanngeqaaq, taanna oqarpoq.
IA: Inulerisut aningaasaliiffigisinnaasariaqarpagut
Perorsaaasut aningaasarsiatik sulinermilu atukkatik naammaginagit Inatsisartut ataatsimiittarfiata silataanni tallimanngormat akerliussutsimik takutitsimmata, Naalakkersuisunut illuatungiliuttut perorsaasut tusaaniartariaqarnerannik oqariartuuteqarput.
Inuit Ataqatigiit siulittaasuata, Múte Borup Egedep, akerliussutsimik takutitsisut torlulaartaatikkut akivai. Akerliussutsimillu takutitsisut siulittaasoq ima oqarmat ersaartaapput:
- Arsaq Naalakkersuisoqatigiinniilerpoq, assagut isaappagut, naammaqaaq alloriartariaqalerpugut, nunatta siunissaa aningaaasalersortariaqarparput, mittarfinnut allanullu milliardilikkaannik aningaasaliisinnaagutta, taava inulerisut nunattalu siunissaannik toqqammaviliisussat aamma aningaasaliiffigissinnaasariaqarpagut.
Vittus: Kommunit isumaqatiginninniarnerat mianerisassaavoq
Perorsaasut 550-it missaaniittut isumaqatigiinniunneqartut Nunatsinni Perorsaasut Kattuffiani NPK-mi siulittaasup Arnaq Brønlundip oqaatigaa. Nunatsinnili perorsaasut pingasuugaangata marluk kommuunit atorfeqartitarisaraat, ataaserlu Namminersorlutik Oqartussat ataani atorfeqartuusartoq aningaasaqarnemut naalakkersuisup eqqumaffigigeqquaa.
AAMMA ATUARUK Akerliussutsimik takutitsisoqareersoq: Politikerit oqalugiaataat neriuuteqartitsipput
- Kisittaanginatta sulisitsisut tassani isumaqatigiinniartut, taamaattumik kommuunit tassani annertoorujussuarmik oqaasissaqarnerat aamma mianerisassaavoq. Malinnaaffigaarput qanimut isumaqatigiinniarnerit qanoq ingerlanersut, aamma killiffik soorunami mianeralugu malinnaaffigilluinnarparput, Vittus Qujaukitsoq oqarpoq.
Perorsaasut ukiumut aningaasarsiaat ilinniartitsisunut inunnillu isumagininnermi siunnersortinut naleqqiukkaanni ukiumut 90.000-it koruunit missaannik ikinnerunerat naammagiunnaarlugu aningaasarsiat malunnaatilimmik qaffanneqarnissaannik perorsaasut kattuffianiit piumasaqaateqarput.