Vittus Mikaelsen: Tunu immikkut kommuninngorli
- Inunnik isumaginnittoqarfik eqqaassanngikkaanni, Tasiilami kommunip allaffia saaffiginniinnartarfittut atorneqarlernikuuvoq, Vittus Mikaelsen oqarpoq.
Pisortat ingerlatsinerisa aaqqissuuteqqinneqarsimanera Naalakkersuisunit, KANUKOKA-mit aamma Nunatsinni borgmesterinit sisamaasunit nalilersorneqarmat, taakku naliliipput aningaasaqarneq aamma inatsisitigut isumannaatsuunissaq eqqarsaatigalugu kommunerujussuanngortitsineq iluatsissimasoq. Najukkanili oqartussaaqataaneq nukittorsartariaqartoq aamma naliliillutik.
Aamma atuaruk Palle Jerimiassen: Iluatsinngitsuugaqarpugut
Kommunerujussuanngortitsinerup kingorna, Tunumi oqartussaaqataaneq malunnartumik ajorseriarsimasoq, Vittus Mikaelsen isumaqarpoq, oqarluni Tunumi innuttaasut oqartussaaqataanerat anguneqarsinnaasoq, Tunu immikkut kommuninngorpat.
- Taanna aatsaat isumaqarpunga nammineq inuiaqatigiit maani akisussaassuteqaqataallutik aallarteqqippata (iluarsissasoq, aaqq.) Tassa imaappoq tunu kommunerujussuarminngaanniit immikkoortittariaqarpoq, Vittus Mikaelsen KNR-imut oqarpoq.
Kommuneqarfik Sermersuup allaffeqarfiata Nuummi inissisimanera pissutigalugu Tunumi innuttaasut qanimut oqartussaaqataanerat innarlerneqarsimasoq naqissuserpaa.
Kommunit maanna sisamaasut ilaat avinneqaqqissagaluarpata, tamanna annertuumik aningaasartuuteqarnermik kinguneqassasoq taamatullu ikaarsaariarnermi aaqqissuussaanikkut unammilernartuussasoq, Naalakkersuisut borgmesterillu nalilliipput.
Aamma atuaruk Kommunit pillugit ataatsimiinneq sisamanngorpat aallartissaaq
Pisortallu ingerlatsinerisa aaqqissuunneqarnerat nalilersorneqarmat, inatsisitigut isumannaatsuuneq pitsanngorsimasoq nalilerneqarpoq, tamanna innuttaasut amerlanerit kommunimit ataatsimit sullinneqarnerisa assigiinnerulersimaneranik kinguneqarsimasoq nalilerneqarluni.
Tunuli Kommuneqarfik Sermersuuminngaanniiit avissaartinneqassagaluarpat, inatsisitigut isumannaatsuuneq innarlerneqarnavianngitsoq, Vittus Mikaelsen isumaqarpoq.
- Uanga ernumassuteqanngilanga minnerpaamilluunniit. Peqqutigalugu 1960-minngaanniit kommunit tamarmik aningaasalersorneqarnikuupput. 2009-mi tamanna aatsaat allanngorpoq.
- Initaartornikuuvugut, kisianni 2010-mi unittooriartuaariarluta maannakkut unittuuvippugut.
- Sulisut 16-nit upernaaq soraarsinneqarput. Ima ilungersortigaat, atorfillit ukiorpassuarni neqeroorfigineqarput, suliffiit tigummiinnarusukkukku Nuummut nuuttariaqarputit, Siumut sinnerlugu Kommuneqarfik Sermersuumi kommunalbestyrelsimut ilaasortaq, Vittus Mikaelsen taama oqarpoq.
