Kommunit pillugit ataatsimiinneq sisamanngorpat aallartissaaq
Ataatsimiissutigisassaallu pingaaruteqartut arlaqarput. Kommunini 2016-imut aningaasanik nalimmassaariniarnerup tunngavii ullaap tungaani oqallisigineqassapput.
Kommuneqarfik Sermersuullu nalimmassaanermi aningaasanik amerlanernik kommuninut allanut tunniussinissaanut pilersaarut tassani pissanngassutigineqarpoq.
Aamma atuaruk VIDEO Nalimmassaanermut Sermersuup pilliutai amerlavallaarsorineqarput
Tamatumalu kingorna allamik ataatsimiissuteqassapput.
Kommunit 2009-mi aaqqissuuteqqinneqarnerisa pillugu qiteqqunnerani nalilerneqarnerani inerniliussat ullup qeqqata kingorna saqqummiunneqassapput.
Kommunit 18-it kattussuunneqarnerisigut inuiaqatigiit sullinneqarneranut pitsanngorsaanissamik aamma allaffissornikkut inatsisiliornerullu piuminarnerulersinnerisigut inatsisitigut isumannaatsuuneq taamani Naalakkersuisut anguniarpaat.
Kommuunerujussuanngortitsitsinermilu anguniakkat ilaat iluatsissimasut, allalli iluatsinngitsoorsimasut qiteqqunnerani naliliinerup takutippaa.
Qaasuitsup Kommuniani innuttaasut kommunip avinnissaa pillugu taasitinneqaramik, amerlanerit avitsikkusullugu taasipput. Kommunilu avinneqassappat kommuninik aaqqissuusseqqinnerup ilusissaa sunnerneqassaaq.
Aamma atuaruk Amerlanerussuteqarluartut kommunip avinneqarnissaa taperserpaat
Ataatsimiinnermilu oqaluuserisassap tullia kommunit sannaanut attuumassuteqarpoq, tassami kommuni avissagaluarpat kingunerisinnaasaanut misissueqqissaaarneq saqqummiunneqassammat.
Ataatsimiinnerlu tallimanngorpat naggaserneqassaaq, tassanilu Namminersorlutik Oqartussat kommunillu qanoq suleqatigiilluarnerusinnaanerat ullaap tungaani eqqartorneqassalluni. Atortorissaarutit digitaliusut atorlugit suliassat suliarineqarsinnaaneri tassani ilaatigut siunnersuutigineqarpoq.
Ataatsimiinnermilu naggasiutigalugu oqaluuserineqartussaq tallimanngorpat ullup qeqqareernerani oqaluuserineqassapput.
Nunatta ataqatigiinnermut attaveqarfii aamma Nunatta inuussutissarsiornikkut ineriartornera tassani oqaluuserineqassapput.
