Palle Jerimiassen: Iluatsinngitsuugaqarpugut

Pisortat suliassaqarfiutaasa ataatsimiissutigineqarneranni kommuunit kattunnerisa qiteqqunnerani naliliineq saqqummiunneqarpoq. Iluaqutaasussatullu siunnerfigineqarsimasut arlaqartut iluatsissimanngitsut, sulilu sulissutigineqartariaqartut, naliliinerup ilaatigut inerniliussaraa. KANUKOKA-lu iluatsinngitsuugaqarsimasoq kattuffiup siulittaasuata Palle Jerimiassenip oqaatigaa.

Allattoq Ivik Kristiansen, Laura Aggernæs

juunip 05-at 2015 11:37

- Iluatsittoqarpoq, aamma taakkua suliarissallugit pilerinarput. Kisianni aamma iluatsinngitsoqartoq, taannalu nassuerutigisariaqarparput. Innuttaasut oqariartorput, arlaannik kukkuvusi. Taamaattumik una nalilersuineruvoq, taannalu aqqutissanik nutaanik tikkuussisariaqassaaq, kukkunersiuisut BDO-p kommunit kattunneri pillugu qiteqqunnerani naliliinerat saqqummiunneqareersorlu, KANUKOKA-mi siulittaasoq Palle Jerimiassen oqarpoq.

Kommunini innuttaasut ataasiakkaat qanoq sunniuteqarsinnaanerat pillugu misissuineq ataatsimiinnermi aamma saqqummiunneqarpoq.

Kommunini innuttaasut 744-rut tassani apersorneqarsimapput, taannalu naapertorlugu innuttaasut sullinneqarnertik ajornerulersimasutut misigaat.

Palle Jerimiassenillu tamanna maluginiarsimavaa.

- Innuttaasup oqariartornera ulluinnarni sullinneqarnerat pitsaanerusariaqarpoq. Taanna aaqqinniarutsigu aqqutinukua suut atorniarivut? Taanna massakkut eqqartorparput, Palle Jerimiassen oqarpoq.

Aamma atuaruk Kommunit pillugit ataatsimiinneq sisamanngorpat aallartissaaq

Kommunit kattunnerisigut suliassaqarfiit 100-t Namminersorlutik Oqartussanit kommuninut suliassanngortinneqartussaagaluarput, taakkunanili taamaallaat tallimat kommuninut suliassanngortinneqarsimallutik.

Tamannalu Palle Jerimiassenip ajuusaarutigaa.

Naalakkersuisut siulittaasuata Kim Kielsenip tamanna aamma maluginiarsimavaa, kommunillu suleqatigalugit aporfiusinnaasut suliarineqarnissaat siunnerfigalugu.

- Kommunerujussuit peqatigalugit eqqartuisaqattaartussaassaagut. Qanoruna ililluta pitsaanerup tungaatigut alloriartitseqqissinnaassasugut. Sakkussanik annikigisassaanngitsunik tassani tunineqallatsiarpugut, naalakkersuisut siulittaasuat Kim Kielsen taama oqarpoq, ilanngullugulu oqarluni, kommunit ineriartornerisa pillugit KANUKOKA-lu qaammatikkaartumik ataatsimiittassallutik isumaqatigiissimallutik.