Visit Greenlandip tammajuitsussarsiniarluni piniartarfiit periarfissaqarnerarpai
Visit Greenlandip Qeqqata Kommuniani tammajuitsussarsiniarluni piniartarfiit nutaat nuannaarutigisorujussuuai.
- Taamaalillutik ukiorpaalunni toqqissillutik takornarialerinissamut periarfissinneqartussanngoramik. Taa,maammat taanna visit Greenlandiminngaanniit nuannaarutigaarput aammalu ukiualuit taanna sulissutigisimallugu takornarialerisutsinnut periarfissaalernissaa, Visit Greenlandip pisortaata tullia, Mads Skifte oqarpoq.
AAMMA ATUARUK Ny koncessionslov er på plads
Takornariat kisimiillutik pinngortitamiissasut
Sumiiffiit akuerissuteqarfiusut takornarialerisunut assigiinngitsunut, kisermaassiffiusussanngorlugit agguaanneqassapput. Tamannalu takornarianut pinngortitami kusanarluinnartumi, allanik takornariaqarfiunngitsumi illuaqqiornissamut periarfissagissaarnerulermik aamma kinguneqassaaq.
Sumiiffiilli akuersissuteqarfiusut eqqartorneqaraangata tamatumannga nuannarinninngitsunik ilaqartartoq, Mads Skiftep oqaatigaa.
- Tassami naapitaqartarsimapput oqartunik: ”kalaaliusugut tamanna ileqqorinngilarput. Nunatsinni taamaaliortarnikuunngilagut”. Takornarianillu sullissinermik inerisaavimmeersup tamanna ilumoornerarpaa, oqarlunili aamma, nunaminertanik immikkoortitsilluni inunnut ataasiakkaanut inuussutissarsiuteqarsinnaanerup paasineqarnissaa apeqqutaasoq.
AAMMA ATUARUK Qeqqata Kommunia tammajuitsussarsiniarluni piniarfissaliisoq
Attaveqaqatigiilluarneq pitsaanerusumik paaseqatigiitsitsisartoq
Mads Skifte naapertorlugu sumiiffiit akuersissuteqarfiusut ukiorpassuarni inuussutissarsiuteqarnissamut periarfissiillutik nunanit allanit peqataarusussinnaasunut pilerinarsaataasussaapput.
- Qanoq periarfissaaneraata oqaluttuarinera immaqa pikkoriffigineqarsimanngilaq, taamaalilluni suut periarfissaanerannik paasinninneq amigarluni.
Pitsaaqutaasa oqaluttuarinissaat Visit Greenlandip Namminersorlutik Oqartussallu suliassaraat, Visit Greenlandilu taamaaliorniarnikuuvoq, immaqali naammassimanngitsoq, Mads Skiftep nassuerutigaa.
- Visit Greenlandip imaluunniit Namminersorlutik Oqartussat immaqa erseqqarinnerusumik koncessioneqarnikkut periarfissat qanoq innerannik sunillu pitsaaquteqarneranik nassuiaanerat pitsaanerusinnaagaluarpoq.