Inatsit nutaaq takornariaqarnermut tunngasoq inissippoq
Anguniagaq ersarippoq, nunatsinnimi aningaasarsiorneq siuariartariaqarpoq takornariaqartitsinerlu tamanna siuariartortissavaa.
Inatsisartuni amerlanerussuteqartut ullumi ajornannginnerulersitsippaat paasiuminarsarlugulu nunatsinni nunami sumiiffinni immikkut toqqakkani takornariaqartitsinermik inuussutissarsiornissaq.
Inatsimmi allannguinermi inatsisit sinaakkutissat marluk ataatsimut kattunneqarput, sumiiffinnilu immikkut toqqakkani takornariaqartitsisinnaanissamut akuersissutinik Naalakkersuisut tunniussisinnaanissaminnut taamaasillutik periarfissinneqassapput.
Visit Greenlandip inatsimmi allannguineq iluarisimaarpaa
Inatsimmik allannguineq nunatsinni takornariaqartitsineq pillugu siunnersuisoqatigiit Visit Greenlandip pisortaata Anders Stenbakkenip iluarisimaarpaa.
- Siuariartornissamut alloriarneruvoq. Takornariaqartitsinermilli suliallit nunanit allaneersut Nunatsinni suliaqalersinnaanissaannut suli aporfissaqaaluppoq, inatsisillu allanngortinneqarneratigut maanna taava ajornannginnerulissaaq. Tamanna nuannaarutigaarput, namminerli aamma aqutsisinnaasariaqarpugut, suliffeqarfiit pitsaanerusumik sinaakkusersorneqarnissaat taamaalinikkut anguneqarsinnaassammat, Anders Stenbakken oqarpoq.
Qeqqata Kommuniata periarfissaq tamanna kisimi tigulluarsimavaa. Qaasuitsup Kommuniani annerusumik suli iliuuseqartoqarsimanngilaq.
Anders Stenbakken neriuppoq inatsimmi allannguineq iluatsilluartunik oqaluttuanik peqalissasoq aammalu nuna tamakkerlugu nunami sumiiffimmi immikkut toqqakkani takornariaqartitsinermi iluaqutit nunatta paasilissagai.
Aamma atuaruk Inatsisip allannguutissaata takornariat amerlanerulersissagai
Qaasuitsup Kommuniata isumassarsiaq qularnartoqartikkaa
Qaasuitsulli Kommuniani borgmesterip Ole Dorphip isumassarsiaq qularnartoqartippaa. Nunamimi sumiiffimmi immikkut toqqakkami takornariaqarnermut inuussutissarsiortoqarsinnaanissaa kisermaassilluni sulinertut nalileramigit.
Taassuma saniatigut isumaqarpoq kommuni inatsimmik allannguinissamut piareersimanngitsoq, tassungalu atatillugu oqaatigalugu mittarfeqarnikkut periarfissat aamma killeqartut.
- Nunami sumiiffimmi immikkut toqqakkani takornariaqartitsisoqartalerneratigut takornariat amerlinissaat ilimaginngilara, nunatsinni takornariat tikittut amerlasinnaapput nunarput tikikkuminarninngorpat, mittarfiit toqqaannartumik tikinneqarsinnaasut piorsaaffigineqarpata. Taava takornariat amerlanerit tikittalissapput. Koncessionit piinnarlugit amerliartornissaat ilimagerujussuanngilara, Qaasuitsup Kommuniani borgmesteri Ole Dorph KNR-imut oqarpoq.
