Inatsisip allannguutissaata takornariat amerlanerulersissagai
Sumiiffinni nunami aalajangersimasuni takornariartitsinermut akuersissuteqartarnissaq pillugu inatsisip allannguutissaa inatsisartuni ullumi siullermeerlugu oqaluuserineqarmat inatsisartuni partiinit tamanit tapersersorneqarpoq.
Takornariartitsinermut akuersissuteqartarnermut inatsisip allannguuteqarneratigut
Takornariartitsisartut nunaniminertanik aamma aalisartitsisarfinnik atuisinnaalissapput
Nunatsinni takornariartitsisartut ukiunilu amerlasuuni takornariartitsinermik suliaqartut akuersissuteqartullu avataaneersunit inangerneqannginnissaat inatsisip allanngortinneqarneratiut qulakkeerneqarput, Anders Stenbakken oqarpoq.
Eqalunniartarfiit kinguaariinni ukiuni amerlasuuni eqalunniarfiusartut illersorneqarnissaat attuumassuteqartunut tusarniaassutigineqarmat KNAPK-mit piumasarineqarpoq.
- Kalaallit Nunaani innuttaasut qangaaniit maannamut eqalunniarfittut atoriigaat, nunatat, kuuit imartallu inatsimmi pineqartumi illersorneqarlutik akuersissummik tunniussiffigineqassanngillat
KNAPK-mi siunnersortip uumassusilerisup Bjarne Ababse Lyberthip KNAPK-ip tusarniaanermi ilanngussaa taama saqqummiuppaa.
Kinguaariit eqalunniartarfiisa illersorneqarnissaat inatsisartuni ilaasortap Agathe Fontain-ip IA aamma Per Rosing Petersenip Naleqqameersup Siumut partiia sinnerlugu saqqumiussisumut Ineqi Kielsenimut apeqqutigineqarpoq.
Ineqi Kielsen ima akissuteqarluni oqarpoq,
- Inatsisitigut sinaakkutaqarnissaq KNAPK-ip aamma qaqinnikuusaa tassaavoq, qangarsuaaniilli kuunnik eriaginninnissaq piugorneqassanngitsoq tamatta isumaqatigiissutigisinaassavarput taamaattumik inuussutissarsiornermut ataatsimiititaliami oqaluuserineqarnissaa kissaatigisimavarput.,
Siumut sinnerlugu inatsisartunut ilaasortaq Ineqi Kielsen taama oqarpoq.
Inatsisartuni allannguutissatut siunnersuuteqarneq takornarianik amerlanerusunik tassalu tammajuitsussarsiniartunik asimi tammaarsimaartunik imaluunniit qissartarluni aalisariarniartunik soqutiginninneq annerulersinnaasoq, Visit Greenlandimi pisortaq Anders Stenbakken isumaqarpoq.
Allannguutissatut siunnersuut inatsisartuni 14 april aappassaaneerneqassaaq
