Qeqqata Kommunia tammajuitsussarsiniarluni piniarfissaliisoq
Aallaaniartarfiit aggornilersoqqinnerisigut Qeqqata Kommuniani tammajuitsussarsiniarluni aallaaniartitsinermik suliaqartunut atugassarititaasut pitsanngorsarniarneqarput.
- Qeqqata Kommuniani akuersissuteqarfinnik pingaarnertut suliaqarpugut, taamaaliornikkut takornariartitsisartut siunissaq ungasinnerusoq eqqarsaatigalugu aningaasaliinissamut isumannaannerusumik inissisimatikkumallugit.
Qeqqata Kommuniani pisortaanerup tullia, Laust Løgstrup, taama oqarpoq. Taassuma suliamullu peqataasut allat, soorlu piniarnermut aalisarnermullu naalakkersuisoqarfiup, aallaaniartarfiit aggornilersoqqinneri aningaasaliinissamut pitsaanerusunik atugassaqalersitsinissaat neriuutigaat.
- Takornariammi nunatsinnut tikittartut aningaasarsiorfigissagaanni, taava aamma pitsaasunik periarfissaqartinneqartariaqarput.
AAMMA ATUARUK Umimmaat neqaannik ukioq manna tunisassiortoqalinngitsoq
Periarfissallu taakku aamma immikkuullarissumik misigisassaqartitsinissamut tunngassuteqarput, pisortap tullia oqarpoq.
- Assersuutigalugu illuaqqat qulit sanileriiaarpata, takornariartitsisartullu taakkuninnga piginnittut tamarmik tammajuitsussarsiniarluni aallaaniartitserusuppata, taava takornariap pitsaasumik misigisaqartinnissaa tamarmik angusinnaassanngilaat.
Maannalu akuersissuteqarfiit aqqaneq-marluk pilersinneqarsimapput, taakkunanngalu qulit neqeroortitsinikkut qinnuteqaateqartitsinikkullu takornariartitsisartunut tunniunneqarlutik.
AAMMA ATUARUK Tammajuitsussarsiniarluni piniartitsineq nungusaataanngilaq
Nutaanik akuersissuteqarfeqalerneratigut takornariartitsisartut sumiiffimmik kisermaassillutik aningaasalersuiffigisinnaasaminnik tunineqarput, taamaalillutillu takornarianut aallaaniartittakkaminnut atugassarititaasut pitsanngorsarsinnaanngorlugit.
- Akuersissummillu pigisaqarnikkut, kommunip pilersaarutaanut siunnersuummut ilanngunneqarsimasutut, allat periarfissarinngisaannik illuaraliornissamut periarfissaqarput.
AAMMA ATUARUK Tammajuitsussanik piniartitsinermi ilisimasortanngortut 14-it
Taamatut suliniuteqartoqarnera takornariartitsinerup iluani isertitaqarnerulersitsinissaa suliffinnillu amerlanerusunik pilersitsinissaa kommunimit neriuutigineqarpoq.
Takornariartitsisartut sumiiffimmut akuersissuteqarfigisaminnut ukiumoortumik akiliuteqartalissapput, aamma pisamut ataatsimut akiliuteqartassapput, soorlu maannamut taamaareersoq. Sumiiffiillu amerlanersaannut ukiuni siullerni ukiumut 5.000 koruuninik akiliisoqartassaaq, akiliutaasartorlu qaffakkiartortinneqassalluni. Sumiiffiit amerlanngitsut akikinnerupput.