Umimmaat neqaannik ukioq manna tunisassiortoqalinngitsoq
Akissaqaruit akissaqanngikkuilluunniit assigiippoq.
- Pisiniarfitsinni pisisartut umimmaap neqiserusuttaqaat, Brian Chemnitz Kalaallit Nunaanni Brugsenimi nioqqutissanik pisiniartartuusoq taama oqarpoq. Taassuma ajuusaarutigaa kalaallit tunisassiaannik taassuminnga pisisartut neqeroorfigisinnaannginnamigit. Taannalu Pisiffimmi atorfilimmit taperserneqarpoq.
- Kalaallit Nunaanni ulluinnarni atortussanik nioqquteqarfitsinni allanisulli sapinngisamik kalaallit tunisassiaannik amerlanerpaanik nioqquteqarusukkaluaqaagut, Stilling Jensen Pisiffimmeersoq oqarpoq.
Piumaneqarluartut
Pisiniarfinni taakkunani atorfillit isumaqarput umimmaat neqaat piumaneqartupilussuusut.
- Siusinnerusukkut Lilleholm aamma taakku sioqqullugit Arctic Greenfood umimmaat neqaannik tunisassioraangasa ukiumut umimmaat 200-it neqaat tuniniarsinnaasarpavut, Brian Chemnitz Brugsenimeersoq oqarpoq.
Lilleholm Foods 2016-ip tungaanut umimmaat neqaannik tunisassiortaraluarput, aningaasatigulli imminut akilissappat neqi tunisassiarineqartoq akisuallaalersussaavoq. Pisortaq Lars Møller KNR-imut taama oqaluttuarpoq.
AAMMA ATUARUK Silap pissusiata allanngoriartornera umimmaat akornutigigaat
Taamaammat ukiut aappassaanni umimmaat neqaanik tunisassiornianngillat, tassami taamaaliussagunik januaarimiit marsimut tunisassiorneq ingerlattaraluarpaat. Brugsenimi pisiniartartuusoq Brian Chemnitz aperigaanni, aamma siunissami umimmaat neqisiniaraanni neriulluarnarpallaanngilaq.
- Nersutit nakorsaannit akuerisaasunit umimmaat neqaannik toqoraasartunit maannakkorpiaq pisiassaqarpasinngitsoq, Brugsenimeersoq oqarpoq. Akuerisaasulli akornanni aamma maannakkut umimmannik toqoraasoqanngilaq.
AAMMA ATUARUK Umimmaat amiinik tunisisoqarsinnaanngortoq
Neriniartarfinnili akunnittarfinnilu tamakkuninnga nerisoqarsinnaavoq, tamakkumi kalaaliminerni tuniniaavinni toqqaannartumik piniartunit pisisinnaatitaapput. Pisiffik Brugsenilu isumaqarput aamma namminneq tamakkunannga toqqaannartumik pisisinnaatitaasariaqaraluarlutik.
- Pisortat inuussutissanut oqartussaasut aperisimagaluarpagut piniartunit allagartalinnit toqqaannartumik pisiortorsinnaanerluta. Tamannali ajornakusooqaaq, maannamummi akuerineqarsinnaasimanngilagut Stilling Jensen Pisiffimmeersoq oqarpoq.
Taanna aamma Brian Chemnitz Brugsenimeersoq oqarput, ilinniarluarsimasunik nersutinik toqoraasartoqarlutik, isumartillu malillugu taakku isumannaatsumik akisussaassusilimmillu nersutit neqilerisinnaagaluartut.
2017-imi Lilleholmimit qerisut kingulliit pisiarineqarsinnaasimapput, maannakkulli nungussimallutik.
AAMMA ATUARUK Umimmaat amiinik tunisisoqarsinnaanngortoq
