Umimmaat amiinik tunisisoqarsinnaanngortoq
Nunarput tamakkerlugu pisiortortut ammit qanoq ilillugit tuninissaannut ilitsersuutinik nassinneqarsimapput. Piniartullu umimmaat amiinik suliffeqarfimmut tuniserusunnissaat Great Greenlandip neriuutigaa. Umimmaammi amii piumaneqartupilussuupput:
- Kalaallit Nunaannit nunanillu allanit piniarfigineqartartupilussuuvugut, maannakkulli uninngasuutigisavut naammanngillat. Umimmaat amiinik ullumikkut tunisartakkatta saniatigut 3-400-t ajornaquteqanngitsumik tunisinnaavagut, pisortaaneq Ditte Sorknæs tusagassiorfinnut nalunaaruteqarluni taama allappoq.
Great Greenlandip puisit amii kisiisa nioqqutiginagit allanik nioqquteqarnissani maanna sulissutigileruttorpaa:
- Kalaallit Nunaanni ammit kusanartorsuit pigaagut, taamaammat siunissaq eqqarsaatigalugu puisit amii kisiisa nioqqutiginagit allanik nioqquteqarnissarput tulluartuussaaq, naak puisit amii pingaarnertut nioqqutigiuaannartussaagaluarigut, Ditte Sorknæs taama oqarpoq.