Visit Greenlandimi sulisut Nuummi allaffeqatigiilertut
Visit Greenland Københavnimi marsip aallaqqaataani allaffeqarunnaarpoq.
Tamanna pissasoq, Visit Greenlandip siulersuisui ukiaq aalajangerput. Visit Greenlandimi sulisut 13-iusut nalunaaqutaqatigiillutik suleqatigiilerniassammata taamaaliorput.
- Allaffeqatigiilernitsinni nalunaaqutaqatigiilluta suleqatigiilerpugut, taamaalillutalu akunnerni amerlanerusuni suleqatigiissinnaalerluta, Visit Greenlandip pisortaa Anne Nivika Grødem KNR-imut oqarpoq.
Atorfiit pingasut Københavnimiit Nuummut nuuppaat, allalli marluk suli Danmarkimiikkallassallutik. Misilittagaqarluartunik sulisukinnerulerumanatik taamaaliorput.
Nunatsinni takornarialerinermik ilisimasallit amerlisarumallugit atorluarumallugillu Nuummi allaffeqatigiilerput. Visit Greenlandimi maanna sulisut sulilersussallu tassani pineqartut, Anne Nivika Grødem oqarpoq.
Taamaaliornertik politikkikkut aalajangigaanani sulinermi atukkanik pitsaanerulersitserusunnermik tunngaveqartoq, taanna erseqqissaavoq.
- Taamaalilluta nunatsinni takornarialerisullu piginnaasanik inerisaassaagut, aamma inuussutissarsiortunut suleqatitsinnullu attaveqarnerulissaagut. Tamanna pitsaassasoq qularinngeqaarput.
Amerikami niuffaffiit qaninneruleraat
Nunarput Amerika Avannarlermut Danmarkiminngarnit qaninneruvoq. Tamannalu nunatsinni takornarialerinermi inerisaaleruttornermut pitsaaqutaavoq.
Nuuk, Ilulissat Qaqortorlu nutaanik mittarfeqaleriarpata, nunarput amerikameersunit takornariarfigineqarnerulissangatinneqarpoq.
- Pingaarnertut niueqativut suli taakkuupput. Nunarpulli mittarfissuaqalerluni tikikkuminarneruleriarpat ilaatigut Amerika Avannerlermeersunik niueqateqarnerulerataannaavugut, Anne Nivika Grødem oqarpoq.
- Sulisut katersuutsinnerisigut pingaarnertut niueqatigisatta, tassa nunat killiit avannarliillu taavalu Europap akornanniipajaalerpugut, taanna aamma oqarpoq.
Nunatsinni takornarialerisut suliassanik tulleriiaarinermut takornarialerisunillu suleqateqarnermut tunngasuni attaveqaqatigiilluarnerorusuttut, Visit Greenlandip nunatsinni takornarialerisunik siorna isumasiuinerani erserpoq. Taamaammat Visit Greenland attaveqaqatigiinnermut aamma immikkoortortaarpoq.
