Tusass: Sullissinerlulluta nalunngilarput, aaqqiivigilertoriaannaanngilarpulli

Tasiilami internettip attavilunnera napparsimmavimmi sulinermut kinguneqartartoq innuttaasullu malugisagaat pillugu nunap immikkoortuani nakorsaanerup Tusassimut isornartorsiuinera KNR-ip ippassaq pingasunngornermi allaaseraa.    

Tusass maanna akissuteqarpoq.

- Qaammataasanut attaveqaasersuutit pissutigalugit naammaginartumik sullissisinnaannginnerput nalunngilluarparput, suliffeqarfiup siulersuisuini siulittaasoq Ulrik Blidorf oqarpoq.

Internettimulli attaviit oqallisigineqarneranni nunatsinni attaveqaasersuuteqarnerup immikuullarinnera eqqaamaneqartariaqartoq, taanna isumaqarpoq.  

- Qaammataasanut attaveqaasiorneq sivisusarpoq, siulersuisut siulittaasuat oqarpoq.

Suliassarujussuusoq

Nunammi immikkoortuani nakorsaanerup attaveqatit aaqqeriaannaannerannik oqariartuuteqarneratulli ajornaatsiginngitsoq siulittaasoq oqarpoq. Tasiilamimi napparsimmavimmut ukioq manna siusinnerusukkut attaviliisoqarneratulli iliortoqarsinnaanngilaq.  

Taassuma saniatigut napparsimmavimmi misiliuteqarneq ataavartumik aaqqissutaassappat innuttaasunut akisoorujussuanngorsinnaasoq, taanna oqarpoq.  

Itisiliisinnaanngitsoq

Internettimut attavik maanna qaammataasamit ataasiinnarmeersoq ajortiasoq Ulrik Blidorfip nassuerutigaa. Tassa GreenSat. Taamaattumik attavik pitsaanerusoq qulakkeerniarlugu Tusass qaammataasanut tunngasunik sulialinnik arlalinnik oqaloqateqarpoq.   

- Internettimut attavimmik naammaginartumik siorna aggustimi attaviliinissarput neriuutigigaluarparput, taamaaliorniarnerli suli ilungersunartoqalaarpoq, aamma taamaattuassaaq, teknologiimi taamaappoq.

Attaviit pitsaanerulersinniarlugit Tusass qaammataasanut tunngasunik sulialinnik allanik oqaloqateqartoq taassuma oqaluttuaraa. Oqaloqatigineqartut ilagaat Starlink.

Oqaaseqqissinnaanngilarli. Starlinkimik isumaqatigiinniarnerit aamma oqaaseqarfigisinnaanngilai, Inu:IT-mi Starlinkip qaammataasatigut atortulersuutinut kisermaassisussaatitaanermik unioqqutitsinerarlugu Nalunaarasuartaateqarnermi Aqutsisut suliffeqarfimmik politiinut unnerluutiginnipput.

Nunatsinnili sumiiffinni tamani internettimut attaveqaatit pitsaasuunissaat Tusassip salliukkaa taassuma erseqqissaatigaa, illoqarfinnilu qaammataasanut attavilinni, sakkortusaavilinni imaluunniit immap naqqatigut kabelinut attaveqaatilinniinneq apeqqutaassanngitsoq.   

- Pitsaasumilli attaveqaateqarniaraanni pitsaanerpaanik atortorissaaruteqartoqartariaqarpoq aningaasalersorneqarnissaalu pinngitsoorneqarsinnaanngilaq, Ulrik Blidorf oqarpoq.

Inatsisartut tassaassapput aningaasaliisussat.