Inu:it: Peqqinnissaqarfik saniatigut aningaasartuutinik sipaaruteqartinniaannarparput

Nalunaarasuartaateqarnermi aqutsisut qarasaasialerinermik suliffeqarfik Inu:it kisermaassisussaatitaanermik unioqqutitsisimasutut politiinut unnerluutiginiarlugu sapaatip akunnerata siuliani aalajangerpaat.

Aqutsisummi suliffeqarfik Starlinkimut antennemik pilersitsinermigut nalunaarasuartaatitigut attavimmik tuniniaaqqinnermigut inatsimmik unioqqutitsisoq isumaqarput.

Nunatsinnimi nalunaarasuartaatitigut atortunik kiffartuussinernillu atuisartunut tassa ilinnut uannullu Tusass kisimi tuniniaasinnaavoq.

Inu:it-p tamanna peqqinnissaqarfimmut atatillugu misiliummik suliniutaasoq maanna oqaatigaa. Suliffeqarfik naapertorlugu peqqinnissaqarfik Tunumi ukiarli attavitsigut kinguaattoornermik ajornartorsiuteqarsimavoq.

Misiummik suliniut Nuummi peqqinnissaqarfiup atortorissaarutaannut pingaartunut Tasiilami peqqinnissaqarfimmut Starlink atorlugu attaviliisoqarsinnaanerannik misiliineruvoq.

- Misiliummik suliniutip aaqqiissut sunniuteqarluartorujussuusoq takutippaa. Suliniummik misiliut maanna naammassivoq, atortorissaarullu ingutserneqarluni, Inu:it-mi piginnittoq siulersuisunilu siulittaasoq, Martin Gjødvad KNR-imut akissummi allappoq.

Suliffeqarfiup oqarnera naapertorlugu suliniutip inatsimmik unioqqutitsisinnaanera namminneq peqqinnissaqarfiullu maluginiarsimanngilaat. Taakkumi nalunaarasuartaatitigut attaveqaqatigiinnermik immikkut ittumik atuinissamut inatsit pissutigalugu tamanna akuersissutaasorisimavaat.

- Erseqqissaatigissavarput una misiliummik suliniut inatsimmut innersuussilluta illuatungeriinnik ajunngitsumik isumaqartumik Inu:it-mullu aningaasatigut iluanaarnissamik siunertaqanngitsumik iliuuserineqarmat, Martin Gjødvad allappoq.

Inu:it-p antenne Martin Gjødvadip Danmarkimi umiatsiamini atortussatut nammineq pigisaa atorpaa, taamaammat peqqinnissaqarfimmut saniatigut aningaasartuutinik sipaaruteqartitsiniarnissaq kisiat kissaatigisimallugu allappaa.

Maanna susoqassava?

Inu:it-p politiinut unnerluutiginninneq tusaatissatut tigullugu utaqqimaaginnassallutillu paasissutissiissutigaat.

- Inuiaqatigiinni ajornartorsiutaasumut aaqqiissuteqarnissamut pisortat oqartussaaffiallu ajunngitsumik eqqarsaateqarluta suleqatigiilluta iliuuseqarpugut, tamatumanillu aningaasanik iluanaarniuteqarnata, maanna susoqarnissaa utaqqimaassavarput.

Antenne ingutserneqarpoq, Inu:it-llu Starlink suleqatiginagu.

Suliniut maanna naammassineqarpoq, qarasaasialerinermillu suliffeqarfiup oqarnera naapertorlugu tamanna sukkassutsimut ingerlatsinermilu isumannaassutsimut atatillugu angusaqarfiulluarpoq.

- Teknologii ajunngitsoq nalinginnaasumillu pisortat nalunaarasuartaatitigut atortulersuutaanit neqeroorutigineqartumit pitsaanerusoq takusinnaavarput, Martin Gjødvad oqarpoq.

Taamaakkaluartorli Starlinkimut atatillugu allamik iliuuseqaqqinnissamut pilersaaruteqanngillat.

Suliaq maanna eqqartuussivilersuutigineqarniarpoq. Nalunaarasuartaateqarnermi aqutsisut inatsimmik unioqqutitsisoqarsimaneranik oqaaseqarnerat eqqortuunersoq politiini unnerluussisussaatitaasut isumaqatigineraat apeqqutaavoq.