Takornariataatit tikittussat aatsaat taama amerlatigissapput
Umiarsuit takornariartaatit 480-it nunatsinnut tikinnissartik Visit Greenlandimut nalunaarutigaat. Taakkulu ukioq kingulleq tikittut amerlassusaanut sanilliukkaanni 100-t missaannik amerlanerupput. Taamaammallu takornarialerisut aasaq manna ulapaassagunaqaat.
Tikittussanit 60-it Qaqortoq taliffigissavaat. Allatut oqaatigalugu takornariat 68.000-it kujataani illoqarfiit annersaannut aqqusaarumaarput, taamaammallu takornarialerisut piareersalereerput.
- Ulapputtoqassaqaaq assut, piareersaatit ingerlattorujussuuagut, ingammik sulisussat tungaatigut, taava aamma kaffillertarusutut suli ilasarput, Greenland Sagalandimi pisortaq Pitsi Høegh KNR-imut taama oqarpoq.
Sullissisut amerlanerit pisariaqartippaat
Greenland Sagaland umiarsuarnik takornariartaatinik sullissisarpoq. Ukioq kingulleq takornariartaatit 40-it sullippaat ukiorlu manna sullitassaat 60-iupput.
Taamaammallu sullissisut amerlanerunissaat aamma pisariaqarpoq, taakkuli imaaliallaannaq pissarsiassaanngillat.
- Amigaateqaannaavittarpugut, aasaanerani ilinniartorpassuit tikerarneranni tassani amigateqarneq ajorpugut, nuannertaqaaq sulerusuttut amerlasaramik. Taava kisianni ilinniarnerup aallarteqqilernerani augustusip naajartornerani imaannaanngitsorujussuarmik sulisussaaruteriataarsinnaasarpugut, Pitsi Høegh oqarpoq.
22-nik ukiulik Nikkie Bendtsen takornarianik angallassisartutut ilinniagalik aasaanerani umiarsuit tikikkaangata sullissisarpoq. Taamaammallu ulapaarfimmi sulinermik misilittagaqarluarluni.
- Umiarsuarmi minnerpaamik 12 tiimit sulisarpugut. Tassa nammineq uagut nakkutigisarparput qanoq sivisutigisumik sulissanersugut, kisianni minnerpaamik 12 tiimiusussaavoq, Nikkie Berthelsen KNR-imut oqarpoq.
Taassuma suliassat amerlagaluartut ulluinnaallu ulapaarfiugaluartut, takornarialerisutut sullissineq mersernannginnerarpaa, akerlianilli kajumissaarivoq inunnimmi assigiinngitsorpassuarnik naapitsiffiulluartarpoq.
- Sullissineq nuannarigussiuk taava misilittariaanaavoq turistilerineq, Nikkie Berthelsen oqarpoq.
Umiarsuit takornariartaatit assigiinngitsut nunatsinnut siorna 388-eriarlutik tulapput.