Islandimiut savalimmiormiullu nunatsinni takornarialerisut siunnersoraat
Kalaallit Nunaannit, Islandimit Savalimmiuniillu takornariartitisiviit, Nunat avannarliit killiit takornarianut nittarsaassisarneranni sapaatip akunnerani ingerlasumi Nuummiipput. Takornarialerisut naapiinnerat Vestnordenimik taaguuteqartoq inunnit 420-nit ikinnerunngitsunit peqataaffigineqarpoq.
Islandimi Savalimmiunilu takornariartitsinermik misilittagaqarluarput, taamaammat takornarialerisut nunatsinni mittarfissuit naammassippata takornarialerineq pillugu
nunatsinnut siunnersuuteqartippagut.
Suleqatigiinneq pingaaruteqarpoq
Takornariaqarnerup takornarianut nunaqartunullu pitsaasumik ingerlanissaanut, Islandimiit nunatsinnut siunnersuutissaqarput.
Visit Icelandimi pisortaq, Sigríður Dögg Guðmundsdóttir
- Siunnersuutissara tassaavoq suleqatigiinneq. Piorsarsimassutsimut tunngasumik suliaqartut, takornarialerisut aamma inuiaqatigiit suleqatigiilluarnissaat pingaaruteqaqaaq, Visit Icelandimi pisortaq Sigríður Dögg Guðmundsdóttir oqarpoq.
Taassuma oqarnera naapertorlugu Island aasaq manna takornariarfigilluarneqarpoq, nuannersumillu misigisaqarluarsimallutik unnersiorpoq.
Nunaqavissunik piginnittoqarneq
Savalimmiuni mittarfup 2011-mi tallineqarnerata kingorna, takornariat ullormiit ullormut amerlipilooratik ukiut qulit ingerlanerini amerliartorusaarsimasut, takornarialerinermik sullissivimmi Visit Faroe Islandsimi pisortap oqaatigaa.
Visit Faroe Islandip pisortaa Guðrid Højgaard
- Takornariaqarneq eqqarsaatigalugu Kalaallit Nunaannut siunnersuutissara tassaavoq, sapinngisamik nunaqavissunik piginnittoqarnissaq anguniarneqassasoq.
- Tamanna Savalimmiuni takornarialerisutta pikkoriffigaat, takornarialerinermillu suliaqartut nunaqavissunit pigineqarnerisigut aningaasat nunagisami kaaviiaarrinneqalernerinik kinguneqarpoq nunallu iluani aningaasaliiffiulluni, Visit Faroe Islandip pisortaa Guðrid Højgaard oqarpoq.
Siunnersuutit atorluarsinnaavagut
Visit Greenlandimi pisortaq Anne Nivikka Grødemip siunnersuutit atorluarsinnaallugit KNR-imut oqaatigaa.
- Isumaqarpunga siunnersuutigineqartut atorluarsinnaagigut, uagummi aamma nunatsinni attanneqarsinnaasumik takornariaqartitsineq ingerlakkusukkatsigu.
AAMMA ATUARUK Visit Greenlandip takornariartut siammarneruniarsarai
Islandimi ukioq manna ulloq manna tikillugu 85.670 takornariarput.
Inuit 100.000 missaanniittut Savalimmiunut takornariartarput.
Nunatsinnut takornariat ukiumut 80.000 sinnerlugit tikittarput.
- Takornariammi nunatsinni inuiaqatigiinnut annertuallaamik sunniuteqannginnissaat anguniarparput, taanna oqarpoq nangillunilu.
- Assersuutigalugu takornariartaassuit inuppassuarnik ilaasoqarlutik nunatsinnut tikikkaangamik, inuiaqatigiinni mikisunnguarni sunneerujussuartarput, taamaammat unammilligassaqaaluppugut. Tamakku paasisimasaqarfigeriigassagut oqallisigisinnaavagut, Visit Greenlandimi pisortaq Anne Nivikka Grødem oqarpoq.
- Savalimmiunut Islandimullu imatut nunap ataqatigiinnermut attaveqaataanullu assingunngikkaluartoq, tamatta inuiaqatigiit mikisunnguugatta.
Immitsinnut ilinniarfigisinnaavugut
Kalaallit Nunaat, Island Savalimmiullu assigiissuteqaqisut, Visit Icelandimi pisortaq Sigríður Dögg Guðmundsdóttir isumaqarpoq.
- Savalimmiunik Kalaallit Nunaannillu suleqateqarneq Islandimut pingaaruteqartorujussuusoq isumaqarpunga. Pissutigalugu assigiiffeqaratta, tamattalu qeqertaneersuulluta.
- Naak innuttaasuusugut ikittuaraagaluarluta, tamatta immikkuullarissuseqarpugut. Taama suleqatigiinnerput nukittorsaatigaarput immitsinnullu ilinniarfigaluta, Sigríður Dögg Guðmundsdóttir KNR-imut oqarpoq.
AAMMA ATUARUK Borgmesteri: Ilulissani takornariat tikittarnerat pitsaanerusumik aaqqissuunneqartalertariaqarput
Nunatsinni mittarfissuassat piareernissaannut takornariaqarnerup nukittorsarneqarnissaa, nunatsinni innuttaasut atugartuussutsimikkut iluaqutigissagaat Islandimi takornarialerinermik sullissivimmi pisortap naatsorsuutigaa.
- Tamannami takornariaqarnerup siunertaraa. Tassa takornarianut pitsaasuusariaqarpoq, aammali sumiiffimmi najugaqartunut pitsaasuusariaqarluni, Visit Icelandimi pisortaq Sigríður Dögg Guðmundsdóttir oqarpoq.