Visit Greenlandip takornariartut siammarneruniarsarai
- Amerlavittaramimmi. Nunatsinni sumiiffiit assigiinngitsut takornarianik tikinneqarnissamut qassikkaartanissaannullu periarfissaat misissortariaqarparput.
Nunatsinni takornarialerinermik sullissivimmi Visit Greenlandimi pisortaq, Anne Nivíka Grødem, Avannaata Kommuniata borgmesteriata attaviitsup, Palle Jeremiassenip, takornariat tikittartut pillugit aaqqeeqqusineranut tunngatillugu taama oqarpoq.
AAMMA ATUARUK Borgmesteri: Ilulissani takornariat tikittarnerat pitsaanerusumik aaqqissuunneqartalertariaqarput
Palle Jeremiassenimmi Ilulissani aasaq manna takornariat ujameriannerat inuinut artukkiisimammat tamanna aaqqeqquaa. Taamaammallu Ilulissani takornariat ullormut amerlanerpaamik 1000-usarnissaat aalajangersaganngoqqullugu, Palle Jeremiassen noqqaassuteqarpoq.
Visit Greenland: Takornariartaassuit nalinginnaasut tapersinngilagut
Visit Greenlandimi pisortap oqarneratuut ´takornariartaassuit nalinginnaasut´ Visit Greenlandip tapersinngilai.
Takornariartaassuit hunnorujulikkaanik tuusintilikkaanilluunniit ilaasoqartartut uani pineqarput, taakkuami soorlu ikaarfissani takornariarfissanik ilaasuminnut innersuussinermi attanneqarsinnaasumik periuseqartanngillat.
Visit Greenlandili umiarsuarnut ilisimasassarsiuutinut tapersiivoq, taakkua takornariartaassuarni ilaasuninngarnit ikinneroqisunik ilaasoqarlutillu umiarsuarmi ikaarfissanilu aaqqissuussanik ilaasuminnut innersuussinermi attanneqarsinnaasumik periuseqartarmata.
Taakkunanilu ilaasut soorlu nunatsinni atukkat immikkuullarissuunerannik ilisimatinneqarlutillu ikaarfigisaminni ataatsimik arlalinnilluunniit suliassaqartarput. Soorlu eqqakkanik katersisarput ikaarfigisamiluunniit inuinut iluaqutaasussamik aaqqissuussani peqataasarlutik.
Tusarfik: Visit Greenland
- Takornariat imminnut qaleriissaakkunnaarlutik tamarmik nipaassuseq pinngortitarlu immikkuullarissoq tamarmik takusinnaasariaqarpaat, Palle Jerimiassen oqarpoq.
Takornariartaassuimmi Ilulissanut aasaq mannaannaq aqqusaartut 60-init ikinnerunngillat. Taamaammat Avannaata Kommuniata borgmesteriata Naalakkersuisut takornarialerisullu takornariat ujameriattarnerat ingalassimaniarlugu tikittartut siammarneqarnerunissaannik noqqaavigai.
Visit Greenland: Takornariartaassuarnut tikittussanut aalajangeeqataasanngilagut
Visit Greenlandilu isumaqataalluinnarpoq. Nunatsinnimi sumiiffinni assigiinngitsuni takornariat tikerartut ataatsikkuukannertarnerisa ajornartorsiutaanera arajutsisimanngilaa.
Takornariartaassuilli nunatsinnukartussat qassiusarnissaat aalajangersagaanngitsoq, Visit Greenlandimi pisortap ilisimatitsissutigaa.
Umiarsuaatilleqatigiiffissuilli assartugalerisullu soorlu Blue Water Greenland Royal Arctic Linelu tamatumani attavigiittarput.
- Visit Greenland takornariartaassuit tikittussat qassiunissaannik umiarsuilluunniit suut talinnissaannik tunngaviusumik aalajangeeqataasanngilaq. Tamanna umiarsuaatileqatigiiffiit assartugalerisullu oqaloqatigiinnermikkut aalajangertarpaat. Umiarsualiviit ataasiakkaat qanoq talinngasoqartiginersut apeqqutaatillugu umiarsuarnik talittoqarsinnaanersoq aalajangertarpaat, Anne Nivíka Grødem oqarpoq.
AAMMA ATUARUK Umiarsuit takornariartaatit tulattussat aatsaat taama amerlatigisut
Visit Greenlandip nunatsinnilu takornarialerisut Naalakkersuisunut tamanna oqaloqatiginnissutigileruttoraat, taassuma ilisimatitsissutigaa.
Takornariartaassuarni ilaasut pisiortornikittut
Palle Jerimiassenip oqarnera naapertorlugu ujameriattunik takornariaqarnerup ajoqutaa tassaavoq takornariartaassuarni ilaasunut akitsuusiussat kommuninut tunnatik nunattali karsianut tuttarnerat.
Takornariartaassuarnilu ilaasut illoqarfimmi aamma aningasartungaartanngillat. Tamannalu Ilulissanut tikitsinnatik illoqarfinni allaniinnerminni pisiortoreersimasarnerannik ilaaffigisaminnilu nerisaqarnerannik peqquteqakkajuppoq.
Visit Greenlandip nunatsinni takornariat tikittussat sapinngisamik siammarneruniartarai, Anne Nivíka Grødem oqarpoq.
- Nunattami immikkoortortai takornarianut nittarsaakkaangatsigit takornariat ataatsikkukanneq nunatsinnukarnissaat ingalassimaniarlugu sapinngisamik ataqatigiissaariniartarpugut. Sumiiffiit ilaanni kiffartuussisinnaanerup killeqarsinnaasarnera sumiiffiillu ilaanni kiffartuussisinnaassuseqarnerunera eqqumaffigeqqissaartarpagut.
Visit Greenlandip nunatsinni illoqarfiit minnerit nunaqarfiillu akornanni tikeraarfissatsialattut piukkussani 27-t aasanngitsoq saqqummiuppai.
Assersuutigalugu Barcelonami grækerillu qeqertaasa ilaanni Santorinimi taamaliortoqarsimaneratuulli sumiiffiinni aalajangersimasuni takornariat qassiunissaannik killilersuilernissaq kissaatiginerini, pisortap oqaatigerusunngilaa.
Visit Greenlandimi pisortaq inuussutissarsiornermullu naalakkersuisoq, Vivian Motzfeldt (S), angalanerminni sapaatit akunnerata tulliani Ilulissaniissapput.
KNR-ip Vivian Motzfeldt tamanna pillugu apersorniarlugu attavigigaa, taannali suli akissuteqanngilaq.